Трампын тусгай элч Путинийг магтсан нь АНУ-д шүүмжлэл дагуулж байна

ОХУ-ын ерөнхийлөгч Владимир Путин, АНУ-ын ерөнхийлөгч Дональд Трампын тусгай элч Стив Виткофф нар Санкт-Петербург хотод уулзсаны дараа Украины дайныг зогсоох гурван талт яриа хэлэлцээг ирэх сард хийхээр тохиролцсон гэж Кремль мэдэгдсэн. Уулзалтын үеэр Виткофф Путинд "Та миний ерөнхийлөгч Трампыг хүмүүнлэг үзэлтэн гэж их ярьдаг. Та ч бас хүмүүнлэг үзэлтэн юм байна, эрхэм ээ. Би үүнийг тань үнэхээр хүндэтгэж байна" гэж хэлсэн нь АНУ-д шүүмжлэл үүсгээд байна.

Бүгд Найрамдах намын сенатор Том Тиллис сошиал хуудсандаа "Энэ юу болоод байна аа, Стив? Хүмүүнлэг үзэлтэн гэдэг үгийн тодорхойлолтыг дахиад нэг хараач" гэж бичжээ.

Конгрессын завсрын сонгууль ойртохын хэрээр Трамп тав дахь жилдээ үргэлжилж буй дайныг дуусгахын тулд Украины талд үзүүлэх дарамтаа нэмэгдүүлж байна. Тэр өнгөрсөн долоо хоногт Оросоос дизель түлш авахын тулд тус улсын эсрэг зарлах гэж байсан хориг арга хэмжээг цуцалсан. Уг хоригийн хуулийг өнгөрсөн зун нас барсан Бүгд Найрамдах намын сенатор Линдси Грэмийн нэрээр нэрлэсэн юм.

Трамп АНУ-ын болон дэлхийн зах зээлд түлш шатахууны үнэ өссөн явдлыг Ираны дайнтай холбоогүй, зөвхөн Оросын газрын тосны үйлдвэрүүдэд довтолсон Украины ажиллагаанаас үүдэлтэй гэж буруутгаж байгаа.

Сүүлийн үед АНУ Украинд өгдөг тагнуулын мэдээллээ зогсоосон, сансрын холбооны системээ хязгаарласан тухай Киевийн эрх баригчид гомдоллож байна.

Эдгээр алхам нь Трампын шүүмжлэгчдийг төдийгүй нам нэгтнүүдийг нь бухимдуулж байна. "Дональд Трамп албан тушаалд орсноос хойш манай засаг захиргаа Оросын ерөнхийлөгчийн талд үйлчлэх болсныг бид харсан" гэж Гадаад Харилцааны Зөвлөлийн судлаач Лиана Фикс хэлжээ. "Трампын завсрын сонгуулийн өмнөх сандралыг Путин ашиглаж, түүгээр маш сайн тоглож чадаж байна" гэж тэр нэмсэн.

"Заримдаа би АНУ-ын хүмүүс Украин улс Оросын түрэмгийлэгчийн эсрэг оршин тогтнолын төлөө дайтаж байгааг ойлгож байгаа болов уу гэж гайхдаг" гэж АНУ-ын армийн тэтгэвэрт гарсан хурандаа, Вест Пойнт дахь цэргийн түүхийн хөтөлбөрийн захирал асан Жиан Жентиле хэлжээ. "Трампын эдгээр үйлдлүүд нь Украинд хор хөнөөл учруулах зорилготой гэдэгт эргэлзэх зүйл алга" гэж АНУ-ын тэнгисийн цэргийн тэтгэвэрт гарсан хурандаа, Стратегийн болон Олон Улсын Судалгааны Төвийн ахлах зөвлөх Марк Канчиан хэлсэн байна.

Трамп, Путин нарын харилцааны асуудал эртнээс анхаарлын төвд байсаар ирсэн. 2016 онд Трамп сонгуульд ялахад Оросын нөлөө орсон эсэхийг Конгрессын шийдвэрээр мөрдөн шалгаж байсан бөгөөд Трамп үүнийг "худал гүтгэлэг" гэж нэрлэдэг.