Хүнсний аюулгүй байдлын хууль зөрчсөн 422 зөрчил бүртгэгдэв

Улсын Ерөнхий Прокурорын газрын Зөрчлийн хууль тогтоомжийн хэрэгжилтийг хангуулах газар 2026 оны гуравдугаар улирлын байдлаар «Хүнсний бүтээгдэхүүний аюулгүй байдлыг хангах тухай хууль зөрчих» зөрчлийн гаралт, шийдвэрлэлтийг судалжээ.

Эрх бүхий албан тушаалтнууд дээрх хугацаанд энэ төрлийн зөрчлийн талаар нийт 422 гомдол, мэдээлэл хүлээн авч шалгасан байна. Үүний 160 буюу 37.9 хувь нь нийслэлд, 262 буюу 62.1 хувь нь орон нутагт бүртгэгджээ.

Зөрчлийн төрөл

• «Хэрэглэж дуусах хугацаа хэтэрсэн хүнсний бүтээгдэхүүн үйлдвэрлэсэн, хадгалсан, худалдсан» зөрчил 202 бүртгэгдэж, нийт зөрчлийн 47.9 хувийг эзэлсэн нь хамгийн өндөр үзүүлэлт болжээ.
• Хүнсний чиглэлийн үйл ажиллагаа эрхлэгч чанар, аюулгүй байдлын шаардлага хангаагүй түүхий эд, бүтээгдэхүүнээр үйлдвэрлэл явуулсан, хадгалсантай холбоотой хоёр зөрчил бүртгэгдсэн нь хамгийн бага үзүүлэлт аж.

Бүртгэгдсэн нийт зөрчилд шийтгэл оногдуулсан байдлыг харвал 385 хүн, хуулийн этгээдэд шийтгэл оногдуулж, үүний 210 буюу 54.5 хувь нь хуулийн этгээд, 175 буюу 45.5 хувь нь хүн байна.

Зөрчил шалган шийдвэрлэх ажиллагааны явцад хүн, хуулийн этгээдэд нийт 759.2 сая төгрөгийн торгох шийтгэл оногдуулснаас 489.5 сая төгрөг буюу 64.5 хувь нь төлөгдсөн байна.

Прокурорын байгууллагаас хүнсний чиглэлийн үйл ажиллагаа эрхлэгчдэд бүтээгдэхүүний чанар, аюулгүй байдал, хадгалалтын нөхцөл, хэрэглэж дуусах хугацаанд тавих хяналтаа сайжруулж, холбогдох хууль тогтоомжийг мөрдөхийг уриалжээ.