ХХБ Өвөр Монголын банктай ногоон санхүүжилтийн чиглэлд хамтрана

ХХБ нь Өвөр Монголын банктай 14 дэх жилдээ хамтран ажиллаж байгаа бөгөөд энэ удаа «Монгол дахь Хятадын хөрөнгө оруулалттай аж ахуйн нэгжүүдэд зориулсан банк-аж ахуйн нэгжийн хамтын ажиллагааны уулзалт»-ыг хамтран зохион байгуулжээ.

Уулзалтыг хил дамнасан санхүүгийн хамтын ажиллагааг бэхжүүлэх, аж ахуйн нэгжүүдийн санхүүжилтийн хүртээмжийг нэмэгдүүлэх, бизнес эрхлэгчдийн асуудал, хэрэгцээг хэлэлцэх зорилгоор зохион байгуулсан байна.

ХХБ-ны Гүйцэтгэх захирлын тэргүүн орлогч О.Банзрагч нээлтийн үгэндээ хоёр банкны олон жилийн хамтын ажиллагаа нь хоёр улсын бизнес, хөрөнгө оруулалтын урсгалыг дэмжихэд чухал хувь нэмэр оруулж ирснийг дурджээ.

ХХБ-ны олон улсын газрын захирал О.Баярсайхан өнгөрсөн 14 жилийн хугацаанд гадаад худалдаа, гадаад төлбөр тооцоо, худалдааны санхүүжилтийн чиглэлээр хамтран ажиллаж ирсэн бол одоогоос ногоон санхүүжилт, тогтвортой хөгжлийн чиглэлд хамтран ажиллах шинэ боломж нээгдсэнд баяртай байгаагаа онцолсон байна.

Уулзалтын үр дүнд хоёр банк цаашид сэргээгдэх эрчим хүч, ногоон дэд бүтэц, эрчим хүчний хэмнэлттэй технологи зэрэг ногоон санхүүжилт, тогтвортой хөгжлийн төслүүдийг хамтран дэмжихээр болжээ.