С.Цэнгүүн нарын төсвийн ил тод байдлын төслийг УИХ хэлэлцэхийг дэмжсэнгүй

УИХ-ын намрын ээлжит чуулганы өнөөдрийн хуралдаанаар С.Цэнгүүн нарын 31 гишүүн өргөн барьсан Төсвийн тухай хуульд нэмэлт, өөрчлөлт оруулах хуулийн төслийг хэлэлцэхийг дэмжээгүй. УИХ-ын гишүүн С.Цэнгүүн энэ талаар Төрийн ордонд мэдээлэл өглөө.

Тэрбээр "Бидний өргөн барьсан хуулийн төсөл нь татвар төлөгчдийн мөнгийг бүхэлд нь бүх задаргаатай хэлбэрээр онлайнд байршуулдаг байя гэх агуулгатай байсан. Харамсалтай нь гарын үсэг зурж хамтран санаачилсан гишүүд маань эсрэг санал өгөөд энэ хуулийн төслөө дэмжүүлж чадсангүй" гэв.

Мөн "Монгол Улсын төсөв нам тэжээдэг байж болохгүй. Татвар төлөгчдийн мөнгийг төлөвлөх үеэс эхлээд юунд төлөвлөж, хэрхэн зарцуулах гэж байгааг иргэдэд харуулдаг байх ёстой. Иргэдэд харуулдаггүйн улмаас улсын төсөв хэлэлцэх үеэр хаа нэгтэйгээс нууц файл гарч ирдэг" гэж тэрбээр хэлсэн.

Түүний хэлснээр, Засгийн газраас оруулж ирдэг төсвийн төсөл дээр 50, 60 тэрбум төгрөгийн бүхэл дүнтэй тоонууд байдаг учраас задаргааг нь нарийн харах боломжгүй байдаг. "Иргэд болон УИХ-ын гишүүд нэг талбар дээрээс ямар мөнгөн дүнтэй юуг батлах гээд байгааг хардаг байх хэрэгтэй" гэж С.Цэнгүүн нэмж хэлэв.

"Харамсалтай нь энэ удаагийн чуулганаар хэлэлцэхээргүй боллоо. Бид шилэн данснаас ийм мөнгөн дүн ингэж гарсан гэдгийг сүүлд нь хардаг. Анх төлөвлөхөд нь тухайн хэрэггүй зардлыг гаргуулахгүй байхад анхаардаг байх ёстой" гэж тэрбээр онцлов.

"Татвар төлөгчдийн мөнгөний зарцуулалтыг задаргаа бүрээр нь олон нийтэд онлайнд нээлттэй болгох хуулийн төслийг хэлэлцүүлэх саналыг энэ удаа дэмжүүлж чадсангүй" гэж УИХ-ын гишүүн С.Цэнгүүн мэдээлэл өгөхдөө дурдсан.