Япон Улсын ЭСЯ Нөмрөгийн ДЦГ-ын түймэрт харамсал илэрхийлж, Мобикомтой хамт шийдвэрлэхээ мэдэгдэв

Дорнод аймгийн Халхгол сумын нутаг дахь Нөмрөгийн дархан цаазат газарт "Мобиком Корпорац" ХХК-ийн тээврийн хэрэгслээс үүдэн гарсан хээрийн түймрийн асуудалд Япон Улсын Элчин Сайдын Яам анхаарлаа хандуулж байна.

Элчин Сайдын Яам мэдэгдэлдээ уг түймэр ноцтой хохирол учруулсан гэдгийг онцлож, үүнд туйлын ихээр санаа зовниж буйгаа илэрхийлээд Монголын ард түмэнд гүнээ харамсаж буйгаа мэдэгджээ.

Энэхүү хээрийн түймэртэй холбоотой хийгдэж буй шалгалт зэрэг нь бодит баримт болон хууль тогтоомжид үндэслэн зохих ёсны дагуу явагдана гэдэгт итгэж байна

Түүнчлэн хохирол амссан бүс нутаг аль болох хурдан нөхөн сэргэхийг хүсэж, үүний төлөөх арга замыг "Мобиком Корпорац" ХХК-ийн хамт идэвхтэй эрэлхийлэх болно гэдгийг Элчин Сайдын Яам мэдэгдэлдээ дурджээ.