Гэр хорооллын 171 мянган айл өрх шөнийн цахилгааны хөнгөлөлтөд хамрагдана

Улаанбаатар хотын гэр хорооллын айл өрхүүдийг цахилгаан эрчим хүчний шөнийн тарифын хөнгөлөлтөд хамруулах журам ирэх сарын 1-нээс мөрдөгдөнө. Энэ нь 2017 оноос хойш жил бүрийн арваннэгдүгээр сарын 1-нээс хэрэгжиж ирсэн.

"УБЦТС" ТӨХК-аас мэдээлснээр төлбөрийн үлдэгдэлгүй гэр хорооллын айл өрхүүд хөнгөлөлтөд хамрагдана. Хөнгөлөлтийн хугацаа 11 дүгээр сарын 1-нээс дараа оны дөрөвдүгээр сарын 1 хүртэл үргэлжилнэ.

220В-ын сүлжээнд холбогдсон айл өрх 1,500 кВт.ц, 380В-ын сүлжээнд холбогдсон бол 3,000 кВт.ц хүртэлх хэрэглээг 100%, түүнээс давсан хэсгийг 50% хөнгөлнө. Хөнгөлөлт нь оройн 21:00 цагаас өглөөний 09:00 цаг хүртэлх хэрэглээнд үйлчилнэ.

Цахилгааны төлбөрийг тооцохдоо тоолуурын заалтаар өдөр, орой, шөнийн хэрэглээний хувийг гаргаж, шатлалт тарифаар (150 кВт.ц хүртэл, 151-300 кВт.ц, 300 кВт.цагаас дээш) үржүүлж нийлбэр дүнг гаргадаг.

Шөнийн тарифын хөнгөлөлтөд цахилгааны төлбөрийн өргүй, зөвхөн ахуйн хэрэгцээнд болон амьдарч байгаа гэр сууцаа халаах зориулалтаар хэрэглэдэг, цагийн ялгаварт тоолууртай айл өрхүүд хамрагдана.

Улаанбаатар хотын гэр хорооллын бүс 171,000 гаруй айл өрхтэй.