С.Цэнгүүн: Төсвийн задаргааг нээлттэй болгох саналыг гишүүд дэмжсэнгүй

УИХ-ын гишүүн С.Цэнгүүн өнгөрсөн баасан гарагийн чуулганаар төсвийн тухай хуульд нэмэлт өөрчлөлт оруулах тухай хуулийн төслийг 38 гишүүн өргөн барьсныг мэдээлэв. Төслийн гол зорилго нь татвар төлөгчдийн мөнгөөр бүрддэг улсын төсвийг бүх задаргаатайгаар нь онлайнд байршуулах юм.

Гэвч хамтран санаачилсан гишүүд нь хүртэл эсрэг дарсны улмаас төслийг дэмжүүлж чадсангүй. С.Цэнгүүн Монгол Улсын төсөв нам тэжээдэг төсөв байх ёсгүй гэдгийг онцлов. Улсын төсөв хэлэлцэхдээ иргэддээ ил тайлагнадаггүйн учраас нууц файлууд гарч ирээд маргаан дагуулдаг гэж тэрээр хэлэв.

УИХ-ын гишүүдэд байгаа төсвийн төсөл дээр хүртэл нарийвчилсан задаргаагүй бүхэл дүнтэй төсвүүд батлагддаг. Ирэх онд ямар санхүүжилт аль салбар луу орж байгааг харах нь ардчиллын хэлбэр гэж тэрээр үзэж байна.

Иргэд төсөв батлагдсаны дараа биш төлөвлөж байх явцыг мэдэх эрхтэй. Тэгвэл үргүй зардлыг хэмнэж чадна.

Сонгуулийн өмнөх жилд төсөл эрс нэмэгддэг. Энийг яг юунд зарцуулахыг задаргаатай болгохыг зорьж байгаа бөгөөд цаашдаа энэ саналаа гаргасаар байх болно гэж С.Цэнгүүн мэдээлэв.