Оюутолгойн ногдол ашгийн хуулийн төслийг УИХ-аас татан авлаа

Засгийн газар Оюутолгойн ногдол ашгийн хоёр их наяд төгрөгөөр ДЦС-VI болон 10 аймгийн дулааны станц зэрэг нийгмийн ба суурь дэд бүтцийн төслүүдийг санхүүжүүлэх хуулийн төслийг УИХ-аас өнөөдөр татан авсан. Энэ тухай Ерөнхий сайд Н.Учрал Төрийн ордонд сэтгүүлчдэд мэдээлэл өгөхдөө хэлэв.

Н.Учрал: "17 жил хувь нийлүүлэгчдийн гэрээнд огт өөрчлөлт орж байгаагүй. 17 жилийн дараа Засгийн газар 30 их наяд төгрөгийн зардлыг бууруулах гэрээнд албан ёсоор хэлэлцээр дуусгаад гарын үсэг зурсан. Одоо гурван жил тутамд зээлийн хүүг ярьдаг болсон." гэж хэлсэн.

Тэрбээр 2037 оноос өмнө ногдол ашгийн талаар огт яригдаж байгаагүй бөгөөд одоо ногдол ашгийг 10 жилээр наашлуулж авахаар тохиролцсон гэдгийг дурдав. Оюутолгойн ТУЗ-ийн даргатай хэлэлцээр хийж, дараа нь Рио Тинто-ийн гүйцэтгэх захирал Монголд ирэхэд хэлэлцээр хийж, ногдол ашгийг 2027 оноос өгөхөө дахин баталгаажуулсан гэж тэрбээр ярьсан.

Ногдол ашгийн хэмжээг ирэх оны төсөвт тоогоор оруулан батлуулсны дараа хуулийг дагах шаардлага тавьсан гэж Ерөнхий сайд хэлэв. УИХ-д өргөн мэдүүлэхдээ Оюутолгойгоос орж ирэх гурван их наяд төгрөгийн ногдол ашгийн нэг их наяд төгрөгийг Хуримтлалын санд хадгалж, хоёр их наяд төгрөгөөр эрчим хүч, боловсролын салбарын төслийг шийдүүлэхээр санал болгосон.

Гэвч УИХ-ын зургаан байнгын хороо хуралдсаны дараа зарчмын зөрүүтэй 235 санал гарсан. Н.Учрал: "Засгийн газрын бодлоготой нийцэхгүй байна. Тиймээс Засгийн газрын ээлжит бус хуралдаанаар хуулийн төслийг татан авлаа." гэж хэлсэн.

Тэрбээр ногдол ашгийн асуудал орхигдоогүй гэдгийг онцлов. "Ногдол ашиг авахаа харилцан тохиролцсон. Одоо бид тоон дээрээ эцэслэж тохиролцоод орж ирсэн ногдол ашгийг хуваарийн дагуу Хуримтлалын санд хийж, эрүүл мэнд, боловсрол, орон сууцанд зарцуулна. Хоёр их наяд төгрөгөөр дэд бүтцийн төслүүдийг санхүүжүүлэхгүй. УИХ-ын гишүүдийн гаргасан саналууд байхгүй болж байна. Одоо ингээд ямар ч зовлонгүй боллоо" гэв.

Сэтгүүлчид Оюутолгойн ногдол ашгийг бэлэн мөнгөөр тараах эсэхийг асуухад Н.Учрал: "Иргэдээс дансанд нь хийх үү гэж асуу гээд байсан. Хууль давж тэгж асууж чадахгүй. Баялгийн сангийн хуулийн дагуу Хуримтлалын санд оруулаад боловсрол, эрүүл мэнд, орон сууцанд зарцуулна." гэж хариулсан.

Тэрбээр ирэх жилээс Баялгийн сангийн хуулийн дагуу Оюутолгойгоос орж ирсэн ногдол ашгийг зөвхөн эрүүл мэндэд зарцуулах байдлаар хязгаарлаж нээвэл инфляц хөөрөгдөхөөс сэргийлэх боломжтой гэж хэлсэн. Хэрэв бэлэн мөнгөөр тараах сонголт хийвэл хуулийг өөрчлөх шаардлагатай гэдгийг тэрбээр дурдав.

Н.Учрал: "Оюутолгойн ногдол ашгийн гурван их наяд төгрөгийг УИХ-аар албажуулаад авчихсан бол бодитой байх байлаа. 17 жил яригдаагүй байсан ногдол ашгийн үүд хаалга 2027 онд нээгдэж байгаа. Энэ бол түүх." гэж хэлсэн.