Орон сууцны залилан: 2,208 иргэн хохирч, 173 тэрбум төгрөгийн хэрэг бүртгэгдэв

Орон сууцны залилах гэмт хэргийг мөрдөн шалгах дэд ажлын хэсэг энэ оны долоодугаар сарын 21-нд байгуулагдсан. Цагдаагийн Ерөнхий Газрын даргын тушаалаар 40 алба хаагчтай ажлын хэсэг энэ төрлийн гэмт хэрэгтэй тэмцэх, хохирсон иргэдийн эрхийг хамгаалах чиглэлээр ажиллаж байна.

Энэ он гарсаар улсын хэмжээнд 41,441 гэмт хэрэг бүртгэгдсэнээс 13,371 нь залилах гэмт хэрэг байжээ. Өөрөөр хэлбэл гурван хэрэг тутмын нэг нь залилан мэхлэх гэмт хэрэг байгааг ЦЕГ-ын Мөрдөн байцаах албаны дарга, хурандаа Н.Мишигдорж ярилаа.

Нийтдээ 86 хуулийн этгээдтэй холбогдох орон сууцны 3,990 гэрээ байгуулсан иргэдийн 173 тэрбум төгрөгийн хохиролтой 173 хэрэгт хэрэг бүртгэл, мөрдөн байцаалтын ажиллагаа явуулж, 2,208 иргэнийг хохирогчоор тогтоосон байна. Эдгээрээс 117 хэргийг шийдвэрлэсэн бол 56 хэрэг үлдсэн байна.

«₮173 тэрбумын хохиролтой, 173 хэрэгт хэрэг бүртгэл мөрдөн байцаалтын ажиллагаа явуулж байгаа»

Үлдсэн 56 хэрэг дээр мөрдөгчдийн ажлын хэсэг ажиллаж байна. Хэргийг арванхоёрдугаар сарын 10-ны дотор багтаан шийдвэрлэхээр удирдлага зохион байгуулалтын арга хэмжээ авч ажиллаж байна.

Аудитын дүгнэлт хүлээгдэж байна

Шийдвэрлэлтэд нөлөөлж байгаа хэд хэдэн хүчин зүйлс бий. Олон хохирогчтой, ажиллагаа ихтэйгээс гадна эдийн засгийн болон аудитын дүгнэлт их хүлээгдэж байна.

Тухайн компани хэдэн иргэнээс хэчнэн төгрөг төвлөрүүлж, орон сууцандаа хэдийг оруулсан, иргэдээс төвлөрсөн мөнгийг зориулалтын дагуу зарцуулсан эсэх, хохирогчдын хохирлыг бодитой тооцсон эсэхэд шинжээчийн болон аудитын дүгнэлт гаргуулж байна.

«Хохирогчдын хохирлыг бодитой тооцохоор аудитын дүгнэлт гаргуулж байна»

Оргон зайлсан этгээдүүдийг эрэн сурвалжилж байна

173 хэрэгт мөрдөн байцаалтын ажиллагаа явуулахад оргон зайлсан, хаана байгаа газар нь тогтоогдоогүй сэжигтэй 30 этгээд байсан бөгөөд тэднийг олж тогтоосон.

Дөрвөн этгээдийг олон улсад Интерполын Хөх булант зар мэдээнд зарлуулсан. Одоо хоёр этгээдийн хаягийг тогтоохоор Улаан булант зард зарлуулахаар УЕПГ-т хандаад байна.

5.9 тэрбум төгрөгийн үл хөдлөх хөрөнгө битүүмжилэв

Иргэдийн хохирлыг нөхөн төлүүлэх, зөрчигдсөн эрхийг нөхөн сэргээх нөхцөлийг бүрдүүлэх үүднээс хэрэг бүртгэл, мөрдөн байцаалтын шатанд холбогдох хуульд заасан арга хэмжээг авч байна.

173 хэргийн хүрээнд 5.9 тэрбум төгрөгийн үнэ бүхий үл хөдлөх хөрөнгө, 11 хөдлөх хэрэгсэл буюу тээврийн хэрэгслийг битүүмжилсэн. Тухайн ААН болон сэжигтэн яллагдагчийн 28 дансны шилжилт хөдөлгөөнийг хязгаарлаж, нэг хуулийн этгээдийн эрх шилжүүлэх бүртгэлийг хязгаарласан байна.

«5.9 тэрбум төгрөгийн үнэ бүхий үл хөдлөх хөрөнгийг битүүмжилсэн»

Хуулийн нэмэлт өөрчлөлт санаачилсан

Орон сууцны залилантай холбоотой дэд ажлын хэсгийг Хууль зүй, дотоод хэргийн сайдын тушаалаар байгуулснаас хойш ажлын хэсэг дөрвөн удаа хуралдаж, тодорхой шийдлүүдийг гаргаж байна.

Энэ төрлийн гэмт хэрэг гарахаас урьдчилан сэргийлэх чиглэлээр хууль эрх зүйн зохицуулалт хийхээр хуулийн нэмэлт өөрчлөлт оруулах ажлыг санаачилсан.

«Хууль батлагдвал орон сууцыг давхардуулж олгодог гэх мэтчилэн залилангийн хэргийг таслан зогсоох нөхцөл бүрдэнэ хэмээн үзэж байгаа»