Улаанбаатар хотын музей 387 жилийн ойгоор үзмэрээ үнэ төлбөргүй үзүүлж байна

Улаанбаатар хотын музей үүсэн байгуулагдсаны 387 жилийн ойг тохиолдуулан үзмэрүүдээ энэ сарын 26-30-ны өдрүүдэд олон нийтэд үнэ төлбөргүй үзүүлж эхэлжээ.

15-аас дээш хүн нийслэл хотын түүх, соёлтой танилцахаар ирэх тохиолдолд 11450960 утсаар захиалга өгнө гэж музейгээс мэдэгдэв.

Баянзүрх дүүргийн 15 дугаар хороо, Бөхийн өргөөний зүүн талд байрлах музейн барилга 1919 онд хувийн сууцны зориулалтаар ашиглалтад орж, 1956 оноос музейн үйл ажиллагаа явуулж эхэлжээ.

Музей 70 жилийн түүхэндээ 3,500 гаруй үзмэрийг бүрдүүлсэн бөгөөд олон нийтэд өмнө нь дэлгэгдэж байгаагүй цор ганц үзмэр ч бий гэнэ. Зай, талбайн хүртээмж хангалтгүйн улмаас 3,500 гаруй үзмэрээс 120 гаруйг нь олон нийтэд дэлгэн үзүүлдэг байна.