«Их говийн манаач» Сөүлийн кино наадмаас «Last Stand» шагнал хүртлээ

Найруулагч Э.Ган-Очир, продюсер Ж.Мядагбадам нарын «Их говийн манаач» баримтат кино БНСУ-ын нийслэл Сөүл хотноо гурав дахь удаагаа зохион байгуулагдаж буй «Whistler» олон улсын кино наадмаас «Last Stand» буюу «Эцсээ хүртэл тэмцэх цайз» шагнал хүртлээ. Наадмын 18 орны 47 бүтээлээс Монгол Улсыг төлөөлөн өрсөлдсөн энэхүү бүтээл шагналыг хүртсэн байна.

Нийгмийн шударга ёс, байгаль хамгаалал, уур амьсгалын бодит өөрчлөлтийн төлөө дуу хоолойгоо хүргэж, нуугдаж дарагдсан үнэнийг илчлэн харуулдаг уран бүтээлчдийг онцолдог энэ наадам 2026 оны аравдугаар сарын 23-25-ны өдрүүдэд болж байна.

Энэ удаагийн наадамд 18 орны 47 бүтээл шалгаран оролцож байгаа бөгөөд Монгол Улсаа төлөөлөн өрсөлдсөн "Их говийн манаач" баримтат кинонд олгосон “Last Stand” хэмээх шагналыг эрх мэдэл, заналхийлэл, дарангуйлал болон шударга бус байдлын эсрэг сөрөн зогсож, өөрийн зарчимд үнэнч байж, эх дэлхийгээ эцсийн мөч хүртэл бууж өгөлгүй хамгаалан тэмцэж буй хүмүүсийн түүхийг харуулсан бүтээлд хүртээдэг тухайгаа зохион байгуулагчид онцоллоо.

Шагналд модон өргөмжлөл, мөнгөн шагнал дагалддаг. Өргөмжлөлийг 2014 онд «Севоль» гатлага онгоцны сүйрлээр хүүхдүүдээ алдсан эцэг, эхчүүдийн үүсгэн байгуулсан «4·16 희망목공소» модон урлалын цехэд хийдэг бөгөөд өгөршиж булгарсан, унаж хатсан мод ашигладаг нь «Үхсэн модод шинэ амьдрал бэлэглэж, сүйрлийн айдсыг шинэ ирээдүй, аюулгүй нийгмийн төлөөх тэмцэл болгон хувиргах» бэлгэдэл агуулдаг байна.

Дэлхийд нэн ховор мазаалай баавгай болон говийн экосистемийн тухай өгүүлдэг «Их говийн манаач» баримтат кино 2026 оны нэгдүгээр сард Говийн Их Дархан Цаазат Газрын түүхт 50 жилийн ойд зориулан нээлтээ хийсэн бөгөөд өнгөрсөн хугацаанд дараах амжилтыг үзүүлсэн байна.

• Британид 2026 оны наймдугаар сард зохион байгуулагдсан «MegaFlix» олон улсын кино наадмын «Шинжлэх ухаан болон байгаль орчны шилдэг кино»-гоор шалгарсан.
• АНУ-д мөн өнгөрсөн наймдугаар сард зохион байгуулагдсан «Angeles Documentary» олон улсын баримтат киноны наадмын «Шилдэг зураглаач»-аар шалгарсан.
• Бангкокийн кино наадмаас «Кино шүүмжлэгчдийн нэрэмжит шилдэг баримтат кино», «Шилдэг найруулагч», «Шилдэг эмэгтэй уран бүтээлч», «Шилдэг гэрэл зураг», «Шилдэг зураглаач»-аар шалгарсан.
• Болгар улсын нийслэл Софи хотноо 2026 оны тавдугаар сард зохион байгуулагдсан «Golden FEMI» олон улсын кино наадмаас «Алтайн Өвөр Говийн Алтан Мазаалай» алтан цом хүртсэн.
• БНСУ-ын Бусан хотноо зохиогдсон «Монголын кино өдрүүд»-ийн нээлтийн киногоор мөн шалгарч байв.

Түүнчлэн «Их говийн манаач» бүтээл ирэх сард болох Энэтхэгийн кино наадам болон Бээжингийн кино наадмын «Official Selection» хэсэгт шалгарч, олон орны шилдэг бүтээлтэй өрсөлдөхөөр болсон байна.