Зогсоолын татвар цуцлах өргөдөлд 100 мянга гаруй хүн гарын үсэг зуржээ

Орон сууцны В1 давхрын дулаан зогсоолоос үл хөдлөх хөрөнгийн татвар авч байгааг цуцлах өргөдлийг иргэн О.Батхүү санаачилсан бөгөөд 100,000 хүний гарын үсэг цуглуулах зорилгодоо хүрсэн байна.

Мөрдөгдөж буй хууль, дүрмийн дагуу орон сууцны В1 давхрын үл хөдлөх хөрөнгийн гэрчилгээтэй зогсоолоос хаяг байршлаас нь хамаарч 0.6, 0.8 болон нэг гэсэн ялгаатай хэмжээгээр татвар ногдуулж байна.

Иргэн О.Батхүү Үл хөдлөх эд хөрөнгийн албан татварын тухай хуульд өөрчлөлт оруулж, "Иргэний өмчилж байгаа, өөрийн болон гэр бүлийн хэрэгцээнд ашиглаж байгаа нэг авто гарааш, авто зогсоолыг үл хөдлөхийн албан татвараас чөлөөлнө" гэж тусгуулах санал гаргажээ.

Арваннэгдүгээр сарын 5-нд өргөдөл санал авч дуусмагц "Боловсруулалт хийгдэх", "Засгийн газрын хуралдаанаар хэлэлцэх" шатуудаар үргэлжилнэ.