Богд банк BlueOrchard-аас 15 сая ам.долларын санхүүжилт татлаа

Монгол Улсын бичил, жижиг, дунд бизнес эрхлэгчдийн санхүүжилтийн хүртээмжийг нэмэгдүүлэх зорилгоор Богд банк олон улсын хөрөнгө оруулалтын менежментийн “BlueOrchard” байгууллагаас 15 сая ам.долларын санхүүжилт татсан байна.

Банкны зүгээс санхүүжилтийн эх үүсвэрээ төрөлжүүлэх, харилцагчдын хэрэгцээнд нийцсэн бүтээгдэхүүн, үйлчилгээг хөгжүүлэх зорилгоор олон улсын банк, санхүүгийн байгууллага, хөрөнгө оруулалтын сангуудтай хамтран ажилладаг гэдгийг онцлов. BlueOrchard-тай хэрэгжүүлж буй түншлэл нь олон улсын хөрөнгө оруулагчдын Богд банканд хүлээлгэж буй итгэлийг илэрхийлж, бизнес эрхлэгчдийн санхүүжилтийн хүртээмжийг нэмэгдүүлж, тогтвортой өсөлтийг дэмжих ач холбогдолтой аж.

BlueOrchard байгууллагын тухай

BlueOrchard нь 2001 онд байгуулагдсан, Швейцарь улсад төвтэй, олон улсын хөгжлийн хөрөнгө оруулалтын менежментийн нөлөө бүхий компаниудын нэг юм. Тус байгууллага дэлхийн 100 гаруй оронд хөрөнгө оруулалт хийж, бичил, жижиг, дунд бизнес эрхлэгчдийн өсөлт, тогтвортой хөгжлийг дэмжихэд чиглэн ажиллаж байна.

Богд банкны тухай

Богд банк нь 2014 оноос хойш Монгол Улсын банк, санхүүгийн салбарт үйл ажиллагаа явуулж буй арилжааны банк бөгөөд иргэд, аж ахуйн нэгж, байгууллагуудад банк, санхүүгийн бүтээгдэхүүн, үйлчилгээг хүргэдэг. Тус банк бизнесийн зээл, бүтээгдэхүүн, үйлчилгээг хөгжүүлж, хувийн хэвшлийн хөгжил, эдийн засгийн өсөлтөд хувь нэмэр оруулахыг зорьж ажиллаж байна.