Нийслэлд долоо хоногт галын 57 дуудлага бүртгэгдэж, 3 иргэний амь нас аварчээ

Нийслэлийн хэмжээнд өнгөрсөн долоо хоногт аврах ажиллагааны 5, гал түймрийн 57 дуудлага бүртгэгдсэн. Онцгой байдлын байгууллагын алба хаагчид 3 иргэний амь нас, 133.8 тэрбум төгрөгийн өмч хөрөнгийг авран хамгаалжээ.

Нийслэлийн Онцгой Байдлын Газраас мэдээлснээр, галын дуудлага мэдээллийн 58 хувийг ил гал, 20.7 хувийг цахилгаан ашиглалт, угсралтын буруу, 7 хувийг яндангийн цонолт, 14.3 хувийг бусад шалтгаан эзэлж байна.

Мэргэжлийн байгууллагаас дараах зөвлөмжийг өгчээ:

• Гэр, байшингийн галлагааны аюулгүй байдлыг хангах, яндангийн цонолтоос сэргийлж тогтмол хөөлөх, угаарын хий мэдрэгч төхөөрөмжийг тогтмол ажиллуулах
• Бага насны хүүхэд, өндөр настан, хөгжлийн бэрхшээлтэй иргэдийн аюулгүй байдлыг хангах
• Намрын хуурайшилтын үед ногоон бүс, зуслангийн чиглэлд ил гал гаргахаас сэргийлэх