Нийгмийн даатгалын сангийн орлого 5.6 их наяд төгрөгт хүрч, 17.2 хувиар өсжээ

Нийгмийн даатгалын ерөнхий газрын мэдээллээр 2026 оны эхний есөн сард нийгмийн даатгалын сангийн орлого 5.6 их наяд төгрөгт хүрч, өмнөх оны мөн үеэс 832.2 тэрбум төгрөгөөр буюу 17.2 хувиар өссөн байна.

Орлогын өсөлтөд тэтгэврийн даатгалын сангийн орлого 677.5 тэрбум төгрөгөөр (16.3%), тэтгэмжийн даатгалын сангийн орлого 72.6 тэрбум төгрөгөөр (21.3%) өссөн нь голлон нөлөөлжээ.

Зарлагын хувьд мөн хугацаанд 5 их наяд төгрөг болж, өмнөх оны мөн үеэс 651.3 тэрбум төгрөгөөр (14.9%) нэмэгдсэн байна. Үүнд тэтгэврийн даатгалын сангийн зарлага 551.1 тэрбум төгрөгөөр (13.8%), тэтгэмжийн даатгалын сангийн зарлага 77.2 тэрбум төгрөгөөр (35.1%) өссөн нь нөлөөлжээ.

Тэтгэврийн даатгалын сангаас 2026 оны эхний есөн сард 534 мянган хүнд 4.5 их наяд төгрөг олгосон нь өмнөх оны мөн үеэс тэтгэвэр авагчдын тоо 13.6 мянган хүнээр (2.6%), олгосон тэтгэврийн хэмжээ 551.8 тэрбум төгрөгөөр (13.7%) өссөн үзүүлэлт юм.

Тэтгэвэр авагчдын 80.3 хувь нь өндөр настны, 11.4 хувь нь хөгжлийн бэрхшээлтэй иргэний, 4.4 хувь нь цэргийн, 3.9 хувь нь тэжээгчээ алдсаны тэтгэвэр авагчид байна.

Нийгмийн халамжийн үйлчилгээнд 2026 оны эхний 9 сарын байдлаар 2.4 сая хүнд 1.9 их наяд төгрөг олгосон нь өмнөх оны мөн үеэс хамрагдсан хүний тоо 19.5 мянган хүнээр (0.8%) буурч, олгосон тэтгэвэр, тэтгэмжийн хэмжээ 90.5 тэрбум төгрөгөөр (5.0%) нэмэгдсэн байна.

Нийгмийн халамжид хамрагдсан хүний 54.4 хувь нь хүүхдийн мөнгөн тэтгэмж, 8.2 хувь нь эх, олон хүүхэдтэй өрх толгойлсон эх, эцгийн тусламж хөнгөлөлт, 6.7 хувь нь нийгмийн халамжийн тэтгэмж, 2.7 хувь нь тэтгэвэр, 1.4 хувь нь нийгмийн халамж, хөгжлийн үйлчилгээ, 26.5 хувь нь бусад үйлчилгээ эзэлж байна.