Увс аймгийн Тариалан суманд сураггүй болсон эмэгтэйг эрэн хайх ажиллагаа 12 дахь өдрөө үргэлжилж байна

Увс аймгийн Тариалан сумын Бургастай багийн нутаг "Машийн ам" гэдэг газраас сураггүй болсон 26 настай эмэгтэйг эрэн хайх ажиллагаа 12 дахь өдрөө үргэлжилж байгааг Онцгой байдлын ерөнхий газраас мэдээлэв.

Эрлийн ажиллагаанд Увс аймгийн Онцгой байдлын газар, цагдаагийн байгууллага, орон нутгийн удирдлага, мэргэжлийн анги, ар гэрийнхэн болон нутгийн иргэдээс бүрдсэн 100 гаруй хүн оролцож байна. Мөн эрэлч нохой, нисэгчгүй нисэх төхөөрөмж (дрон), туулах чадвар сайн автомашин, техник хэрэгслийг ашиглаж байна.

Эрлийн багийнхан 10-р сарын 25-ны өдрийн 08:00 цагт хоёр бүлэгт хуваагдан ажилласан. Нэгдүгээр бүлэг нь тухайн иргэний гэрээс баруун болон баруун урд зүгт, хүн тус бүр хоорондоо 15 метрийн зайтай нэг эгнээнд жагсаж, 2 км-ийн өргөнтэй зурвасаар 12 км-т самналт хийсэн. Тэд "Шилийн хар толгой", "Суурин буйр" гэх газрууд хүртэл явж, замд таарах өвөлжөө, хаваржаануудыг нэг бүрчлэн шалгасан.

Хоёрдугаар бүлэг нь гэрийн зүүн урд талаас баруун урд тал хүртэлх бүс нутаг, гуу жалга, уулын хавцлуудыг дроны тусламжтайгаар агаараас тандаж шалгасан ч үр дүнд хүрээгүй. Үзэгдэх орчин хязгаарлагдсаны улмаас эрлийн ажиллагааг 19:48 цагт түр зогсоосон бөгөөд 10-р сарын 26-ны өглөөний 08:00 цагаас дахин эхлүүлсэн.