Хитлерийн "Бүргэдийн үүр"-т гарсан түймрийн хэргээр 33 настай эрэгтэйг баривчилжээ

Баасан гарагийн оройн 21:50 цагт Баварийн Альпийн нуруунд, далайн түвшнээс дээш 1,834 метрийн өндөрт байрлах "Бүргэдийн үүр" хэмээх уулын амралтын газарт гал гарсан тухай дуудлага ирсэн байна. Түймрийг унтраахад 200 орчим гал сөнөөгч дайчлагдсан гэж Бавари мужийн эрх баригчид мэдээлжээ.

Гал унтраах албаны дарга Михаэль Брандл хэвлэлийн хурлын үеэр түймрийн үлдэгдэл голомтуудыг үдээс хойш унтрааж дуусгасныг мэдэгдсэн байна. Барилга нурж болзошгүй гэсэн болгоомжлолын улмаас дотор нь хүн нэвтрүүлээгүй гэж тэрбээр нэмж хэлжээ.

Хүчтэй бороо орсны дараа цасан шуурга дэгдэж, ууланд ширүүн салхи салхилсан нь гал унтраах ажлыг хүндрүүлсэн байна. Цагдаагийн хэвлэлийн төлөөлөгч Лиза Майерын хэлснээр гал сөнөөгчид барилгад ойртохын тулд амьсгалын аппарат ашиглах шаардлагатай болжээ.

Бавари мужийн дотоод хэргийн сайд Йоахим Херрманн уг гал түймрийг "санаатай үйлдсэн гэмт хэрэг" байж болзошгүй гэж мэдэгдсэн.

Баварийн цагдаагийн албаны ажилтан Роберт Холзингер хэвлэлийн хурлын үеэр хэлэхдээ "Бүргэдийн үүр" рүү явж байсан гал сөнөөгчид болон цагдаа нар "улсын дугааргүй, улаан өнгийн мотоцикл унасан этгээд"-ийг олж хараад зогсоосон гэнэ. Цагдаа нар хэргийн газраас нэгэн сэжигтнийг саатуулсан байна.

Орон нутгийн "PNP" сонинд мэдээлснээр прокурорын газрын хэвлэлийн төлөөлөгч Райнер Витце сэжигтнийг тус бүс нутагтай холбоотой боловч тэнд оршин суудаггүй, 33 настай Германы иргэн болохыг мэдэгдсэн байна. Мөрдөн байцаагчид улс төрийн сэдэл байгаа эсэхийг шалгаж байгаа ч сэжигтнийг "сэтгэцийн эмгэгтэй байж болзошгүй" гэж үзэж байна.

1937-1938 оны хооронд баригдсан "Бүргэдийн үүр" нь Хитлерийн "Гуравдугаар Рейх"-ын үлдээсэн өвийн нэг хэсэг бөгөөд жилд 350,000 орчим жуулчдыг татдаг. Чулуу, боржин чулуугаар баригдсан энэхүү байгууламж дэлхийн хоёрдугаар дайны үед ямар ч гэмтэл авалгүй үлдсэн бөгөөд 1952 оноос хойш Нацист түүхийг өгүүлэх үзэсгэлэн дэлгэгдэж, ресторан үйл ажиллагаа явуулж эхэлжээ.

Бавари мужийн дотоод хэргийн сайд уг байгууламжийг "ямар ч тохиолдолд балгас болгон орхихгүй" гэж мэдэгдсэн байна. "Энэхүү байгууламж, түүний эргэн тойрны талбай нь тодорхой нэг түүхтэй холбоотой. Тиймээс бид түүхийг дурсан санах ажлаа үргэлжлүүлэх нь чухал юм" гэж тэрбээр хэлжээ.