Ерөнхийлөгч У.Хүрэлсүх Германия, Финландад төрийн айлчлал хийлээ

Монгол Улсын Ерөнхийлөгч У.Хүрэлсүх Холбооны Бүгд Найрамдах Герман Улс болон Финланд Улсад төрийн айлчлал хийлээ. Айлчлалын үеэр хоёр улстай стратегийн түншлэлийг өргөжүүлэх, хамтын ажиллагааны чиглэлүүдийг тодорхойлсон баримт бичгүүдэд гарын үсэг зурсан байна.

Герман Улс

ХБНГУ-ын Холбооны Ерөнхийлөгч Франк-Вальтер Штайнмайэртай хийсэн албан ёсны хэлэлцээгээр батлан хамгаалах, аюулгүй байдлын салбарын хамтын ажиллагааны асуудлыг хэлэлцжээ. Талууд хоёр улсын Зэвсэгт хүчний хамтын ажиллагааг бэхжүүлж, НҮБ-ын энхийг сахиулах ажиллагаа болон уулын явган цэргийн чиглэлээр төрөлжсөн сургалтууд зохион байгуулахаар тохиролцсон байна.

Ерөнхийлөгч У.Хүрэлсүх: "Монгол Улс Герман Улсыг манай гуравдагч хөрш, Европ дахь дотнын итгэлт түнш, анд нөхөр хэмээн үздэг бөгөөд Европын орнуудаас нэн тэргүүнд Герман Улстай байгуулсан “Стратегийн түншлэл”-ийн харилцаа, хамтын ажиллагааг бүхий л салбарт өргөжүүлэн хөгжүүлэх нь манай улсын гадаад бодлогын тэргүүлэх зорилтуудын нэг юм."

Германы Төрийн тэргүүн: "Манай хоёр улс газар зүйн хувьд зургаан мянга гаруй километрийн алсад оршдог ч ойр дотно түншлэлийн харилцаа биднийг ойртуулан холбож байдаг."

Хоёр улсын стратегийн түншлэлийг өргөжүүлэн бэхжүүлэх Хамтарсан тунхаглал байгуулж, хөрөнгө оруулалт, хөгжлийн хамтын ажиллагаа, банк санхүү, боловсрол, шинжлэх ухаан, батлан хамгаалахын салбарын хамтын ажиллагааг өргөжүүлэн хөгжүүлэх чиглэлээр Засгийн газар болон байгууллага хоорондын баримт бичгүүдийг байгуулсан байна.

Финланд Улс

Финландын Ерөнхийлөгч Александер Стуббтай албан ёсны хэлэлцээ хийж, эдийн засаг, худалдаа, хөрөнгө оруулалт, боловсрол, соёл, батлан хамгаалах, байгаль орчин, эрчим хүч зэрэг салбарт хамтын ажиллагааг өрнүүлэхээр тохиролцжээ. Төрийн тэргүүн нар НҮБ болон олон улсын бусад байгууллагын хүрээнд хамтын ажиллагаагаа бэхжүүлэх талаар ярилцаж, бүс нутаг, олон улсын харилцааны асуудлаар санал солилцсон байна.

Айлчлалын үеэр Ерөнхийлөгч У.Хүрэлсүх Хельсинки хотын Хиетаниеми цогцолборт орших Баатруудын загалмай болон Маршал К.Маннерхеймын бунханд цэцэг өргөж, хүндэтгэл үзүүлжээ. Хиетаниеми цогцолборыг 1829 онд байгуулсан бөгөөд Финланд Улсын тусгаар тогтнол, эрх чөлөө, аюулгүй байдлын түүхэнд гавьяа байгуулсан төрийн болон цэргийн зүтгэлтнүүд, дайчид, алдартай уран бүтээлчдийг оршоосон хүндэтгэлийн цогцолбор юм.

Монгол, Финландын бизнес форумын үеэр хоёр улсын төр хоорондоо 4, хувийн хэвшлийнхэн 6 санамж бичиг зурсан байна.

Финландын Ерөнхийлөгч Александер Стубб Монгол, Финланд улсууд зөвхөн хоорондоо харилцан ашигтай хамтран ажиллах нь хангалттай бус, бүс нутагтаа нөлөөлөх ёстой, олон тулгуурт гадаад бодлогоо тууштай хэрэгжүүлж, НҮБ зэрэг олон улсын байгууллагуудаар дамжуулан бодлого боловсруулах, шийдвэр гаргах түвшинд оролцох ёстой гэдгийг онцолсон байна.