Зургаан байршилд олон түвшний уулзвар, гүүр барина

Нийслэлийн Нэгдсэн Төслийн Удирдлагын Газар “Олон түвшний уулзвар” төслийн эхний шатны Техник, Эдийн Засгийн Үндэслэл /ТЭЗҮ/, нарийвчилсан зураг төсөл болон төсөв боловсруулах ажлыг дуусган баталснаа мэдээлэв. Төслийг 2025-2028 онд хэрэгжүүлэх бөгөөд хотын хамгийн их ачаалалтай уулзваруудын нэвтрүүлэх чадварыг нэмэгдүүлэх зорилготой.

Эхний шатанд дараах таван байршилд олон түвшний уулзвар, гүүрний байгууламж барих аж. Сонгинохайрхан дүүргийн Моносын уулзварыг гүүрэн гарцын шийдлээр шинэчилж, Моносын замыг Толгойтын уулзвартай холбоно. Энэ нь Сонсголон–Товчоо–Толгойтын чиглэлийн хөдөлгөөнийг илүү шууд болгож, зорчих хугацаа болон тээврийн хэрэгслийн ашиглалтын зардлыг бууруулах тооцоололтой.

Механик, инженер, тээврийн сургуулийн уулзварыг шинэчилснээр Алтай хотхоны урд талын авто зам-Механик, инженер, тээврийн сургуулийн уулзвар-Яармагийн авто замын чиглэлийн хөдөлгөөн жигдрэх аж. Төслийн хүрээнд 0.9 км авто зам, 597 м урт гүүр бүхий замын байгууламжийг шинээр төлөвлөжээ.

Хотын зүүн бүсийн гол зангилаа болох Офицеруудын ордны тойрогт 1.4 км урт авто зам барихаар төлөвлөсөн. Зорчих хэсгийг 3.5 м, ногоон байгууламжийг 1 м, явган хүний замыг 2.25 м, дугуйн замыг 1.5 м өргөнтэй байгуулж, явган хүний болон дугуйн зам тус бүрийг 0.8 км уртаар бүтээнэ. Баянзүрх дүүргийн 22, 16, 13, 39 дүгээр хорооны нутаг дэвсгэрт 2.5 га талбайг хамарна.

Хан-Уул дүүргийн Наадамчдын замын нэгдүгээр буудлын орчимд явган хүний гүүр барихаар төлөвлөжээ. Энэ нь хотын захиргааны байр болон Яармагийг холбосон өндөр эрчимтэй авто замын зангилаа хэсэг бөгөөд гүүрэн гарц нь явган зорчигчдыг авто урсгалаас бүрэн тусгаарлаж, ослын эрсдэлийг бууруулах юм.

Мөн Баянзүрх дүүргийн 42, 13 дугаар хорооны нутаг дэвсгэрт Нарт хотхоны зүүн талд байрлах үерийн хамгаалалтын барилга байгууламжийг хамрах гүүрийн төсөл төлөвлөгдсөн. Шинэ гүүр нь 10 м урт, 250 м² талбайг хамарч, гүүрний урд талд хос дөрвөлжин хоолой, хойд талд 8.7 м урт, 12.4 м өргөн гүүр баригдах ажээ.

Улаанбаатар хотын замын хөдөлгөөний ачаалал жилд дунджаар 18 хувиар нэмэгддэг гэсэн судалгаа бий. Хотын хэвтээ тэнхлэгийн авто замын сүлжээгээр өдөрт дунджаар 395 мянган хувийн тээврийн хэрэгсэл, босоо тэнхлэгийн сүлжээгээр 295 мянган тээврийн хэрэгсэл зорчдог.