Зураач Ц.Цэгмэдийн "МОНГОЛ" үзэсгэлэн ХААН галерейд нээлтээ хийлээ

Монгол Улсын Төрийн соёрхолт зураач Ц.Цэгмэдийн "МОНГОЛ" уран бүтээлийн бие даасан үзэсгэлэн ХААН галерейд өнгөрсөн баасан гарагт нээлтээ хийлээ.

Зураач урлагийг "Дээд ертөнцийн санааг зүрх сэтгэлээрээ мэдэрч, бие махбодын гүн мэдрэмжээр нээн илрүүлэх үйл явц" гэж тодорхойлдог. Түүний бүтээлийн үндэс нь зөн совин, онгодын чөлөөт урсгал бөгөөд хүн оюун бодлын хүлээсээ тайлж, дотоод мэдрэмжээ чөлөөтэй илэрхийлэх үед далд ертөнцийн мөн чанарыг бүтээлээрээ дамжуулж чадна гэж үздэг. Энэ үзэл санаа нь өнгө, зураасны хөдөлгөөн, орон зайн зохиомж, цаг хугацааны мэдрэмжээр илэрч, цогц уран сайхны хэллэг болдог.

"МОНГОЛ" үзэсгэлэнгээр зураач Монголын уламжлалт сэтгэлгээ, байгаль дэлхий, хүн төрөлхтний оршихуйн холбоог өөрийн өнцгөөс харуулж байна. Үзэсгэлэнгийн нэр болон бүтээл бүрийн бэлгэдэл, дүрслэл нь Монголын тухай ойлголтыг газар нутаг, түүх соёлоор хязгаарлахгүйгээр оршихуй, сэтгэлгээ, байгальтайгаа харилцах харилцааны түвшинд илэрхийлснээрээ онцлогтой.

Түүний бүтээлүүд Монголын уламжлалт соёл, буддын гүн ухаан, байгаль дэлхий болон хүний оршихуйн холбоог өвөрмөц уран сайхны хэллэгээр илэрхийлдгээрээ онцлог бөгөөд Европын уран зургийн техник, арга барилыг олон жил судалж, монгол сэтгэлгээ, бэлгэдэлтэй хослуулан бүтээлүүддээ тусгаж ирсэн уран бүтээлч юм.

"МОНГОЛ" үзэсгэлэн 2026 оны 9-р сарын 30-ныг дуустал ХААН Банк цамхгийн 3-р давхарт байрлах ХААН галерейд ажлын өдрүүдэд 10:00–18:00 цагийн хооронд нээлттэй байна.