«Zogsool» УСК Бусаны кино наадмаас дөрвөн шагнал хүртлээ

Guru media болон Nomadia Pictures-ийн хамтран бүтээсэн «Zogsool» уран сайхны кино БНСУ-ын 31 дэх удаагийн Бусаны олон улсын кино наадмын Vision Awards-аас «Vision of Jiseok Award», «Hylife Vision Award», «NETPAC Award», олон улсын кино шүүмжлэгчдийн «International Critics Prize» гэсэн дөрвөн шагналыг хүртлээ.

Тус бүтээлийг Монгол, Герман, Франц, Тайланд, Камбож улсын 50 гаруй уран бүтээлчийн оролцоотойгоор нийтдээ хоёр жилийн хугацаанд бүтээсэн бөгөөд олон улсын 3,000 гаруй бүтээлээс шалгарчээ.

Киноны тухайд

Цар тахлын үеийн хүний амьдрал, нийгмийн бодит байдлыг егөөдөл, зүйрлэл, өвөрмөц кино хэлээр илэрхийлсэн тус бүтээл энэрэл, тэсвэр хатуужил, итгэл найдварын тухай өгүүлэх бөгөөд эгэл жирийн хүмүүсийн амьдралд улс төр болоод эдийн засгийн хүчин зүйлс хэрхэн нөлөөлдгийг харуулсан түүх ажээ.

Nomadia Pictures-ийн хамтын ажиллагаа, хувь нэмэр

Nomadia Pictures нь 2013 оноос эхлэн кино контент үйлдвэрлэлийн чиглэлээр ажиллаж, дотоодын болон гадаадын уран бүтээлчид, продакшн компаниудтай хамтран бүрэн хэмжээний уран сайхны болон олон ангит кино, баримтат цуврал, шоу нэвтрүүлэг, анимэйшн зэргийг бүтээсээр ирсэн бөгөөд үндэсний кино бүтээл, уран бүтээлчдийг олон улсын зах зээлд таниулан хүргэхийг зорьж ажиллаж байна.

«Zogsool» уран сайхны кино 2026 оны арваннэгдүгээр сард Монгол Улсад нээлтээ хийхээр төлөвлөөд байгаа аж.