Зеленскийн онгоц дронтой мөргөлдөх шахсныг Норвегийн ерөнхий сайд мэдээлэв

Молдовоос хөөрсөн Украины ерөнхийлөгч Володимир Зеленскийг тээвэрлэж явсан онгоц нисгэгчгүй онгоцтой мөргөлдөх шахсныг Норвегийн ерөнхий сайд Йонас Гар Сторе мэдээлсэн байна. Тэрбээр энэ тухай NRK олон нийтийн телевизээр ярьжээ.

Зеленский Норвегийн хаан V Харальдын оршуулгын ёслолд оролцохоор Осло хотод очсон бөгөөд ёслол дууссаны дараа нутаг буцсан аж.

"Түүний онгоц Молдовоас хөөрөх гэж байхдаа нисгэгчгүй онгоцтой мөргөлдөх шахсан. Энэ бол түүнд тулгарч буй бодит аюулын нэг илрэл" гэж Сторе хэлсэн ч хаанаас ийм мэдээлэл авснаа болон дрон хэр ойрхон байсныг хэлээгүй байна.

Молдовын эрх баригчид Норвегийн ерөнхий сайдын мэдэгдлийн талаар ямар нэгэн мэдэгдэл гаргаагүй байна. Кишинёв хотын нисэх буудлын хөөрөх болон буух нислэгүүд Мягмар гарагт хэсэг хугацаанд зогссон нь Молдовын агаарын орон зайд Оросын хоёр нисгэгчгүй онгоц нэвтэрсэнтай холбоотой байжээ. Хоёр дроны нэг нь эзгүй талбайд унаж шатсан бол нөгөө нь нислэгээ үргэлжлүүлж, хөрш Румын улсын агаарын орон зайд нэвтэрсэн байна.

Молдовын ерөнхийлөгч Майя Санду уг халдлагыг "хүмүүсийн амьдралд ноцтой аюул занал учруулж байна" гэж буруушаагаад Украинтай залгаа хилийн бүсэд хоёр хүний амь үрэгдсэн явдалд харамсал илэрхийлжээ.

Норвегийн ерөнхий сайд өмнө нь Мягмар гарагийн орой Украины агаарын хамгаалалтын асуудлаар Зеленскийтэй уулзах гэж байгаагаа мэдээлж байсан юм.