Зеленский, ЦРУ-ын дарга Рэтклифф нар Ирландад уулзжээ

Украины ерөнхийлөгч Володимир Зеленский болон АНУ-ын Тагнуулын Төв Газрын (CIA) дарга Жон Рэтклифф нар Ирланд улсын Шеннон нисэх онгоцны буудалд уулзсан тухай албаны хоёр эх сурвалж мэдээлсэн байна.

Даваа гарагт болсон гэх уг уулзалтын талаар нэг эх сурвалж мэдээлсэн бол нөгөө нь онгоцнууд түлш цэнэглэж байх хооронд тэд албан бусаар ярилцсан гэдгийг баталсан ч тодорхой цаг хугацааг дурдаагүй байна.

Асуудал маш нууц тул эх сурвалжуудын аль аль нь хоёр талын ярианы агуулгыг задруулахаас татгалзжээ.

Зеленский өмнөх өдөр нь НҮБ-ын жил бүр зохион байгуулдаг дэлхийн удирдагчдын чуулга уулзалтад оролцохоор явсан бол Рэтклифф Египетийн ерөнхийлөгч Абдель-Фаттах эль-Сиситэй уулзсаныхаа дараа буцах замдаа байжээ.

Сарын өмнө Рэтклифф урьдчилан зарлалгүйгээр Москвад айлчилж, Оросын холбогдох албаныхантай уулзсан бөгөөд Москвад чухам юу хэлэлцсэнийг Рэтклифф ч, ЦРУ ч нийтэд мэдээлээгүй байна.

Зеленскийн уулзалтын талаар мэдээлсэн эх сурвалжуудын нэг нь «Москвад айлчлахдаа Рэтклифф тав дахь жилдээ үргэлжилж буй Украины дайны асуудлыг хэлэлцсэн» гэдгийг баталсан ч дэлгэрэнгүй мэдээлэл өгөхөөс татгалзжээ.

Рэтклифф айлчлалынхаа үеэр Оросын дайны нөхцөл байдлын талаар өөрийн байгууллагын хийсэн нэлээд тааруу үнэлгээг танилцуулж, байр сууриа сулрахаас өмнө тохиролцоонд хүрэхийг Москвагийн эрх баригчдад уриалсан тухай Нью-Йорк Таймс сонин өнгөрсөн сард мэдээлж байв.