Зеленский Трампын эрчим хүчний тохиролцооны мэдэгдлийг няцаав

АНУ-ын ерөнхийлөгч Дональд Трамп өнгөрсөн амралтын өдөр сэтгүүлчидтэй уулзахдаа дэлхий дахинд дизель түлшний хомсдол үүссэнийг Украин Оросын газрын тос боловсруулах үйлдвэрүүд рүү довтолж буйтай холбож, агаарын цохилтоо зогсоохыг Киевт уриалсан.

Даваа гарагт тэрээр сошиал хуудсандаа "Украин улс Оросын эрчим хүчний байгууламжуудад довтлохоо зогсоохыг зөвшөөрсөн. Орос улс бас адилхан зөвшөөрсөн. Дэлхий дахинд дизель түлшний үнэ өссөн нь Орос-Украины дайнтай холбоотой, Ирантай холбоогүй" гэж бичсэн байна.

Харин Украины ерөнхийлөгч Володимир Зеленский энэ мэдэгдлийг шууд бус утгаар няцаасан. Холбоотнууд нь Украины дэд бүтцүүд рүү чиглэсэн Оросын довтолгоог зогсоох баталгаа гаргаж өгвөл Украин ижил арга хэмжээ авахад бэлэн гэдгээ тэр мэдэгдсэн. Гэхдээ Орос ямар нэг тохиролцоог дагах хүсэлтэй эсэхэд эргэлзэж буйгаа давхар илэрхийлжээ.

"Орос улс ямар нэг тохиролцоог дагаж мөрдөх хүсэлтэй байгаа эсэхэд Украин итгэлгүй байна. Дайныг зогсоох ёстой. Чухал дэд бүтцүүдийг тойрсон хурцадмал байдлыг намжаах нь энх тайванд хүрэх эхний алхам байж болох юм. Бид түншүүдээсээ тодорхой шийдэл хүлээж байна" гэж тэр Телеграм хуудсаараа мэдэгдсэн.

Зеленский мөн ийм тохиролцоо нь "найдвартай, урт хугацааны, хүмүүсийн амьдралд бодитой нөлөө үзүүлэхүйц" байх ёстойг онцолсон.