Зеленский АНУ-аас ирсэн сануулга гэж үзсэн Старлинкийн хязгаарлалтыг тайлбарлав

Ням гарагт Володимир Зеленский АНУ-ын тагнуулын мэдээлэл солилцох үйл явцыг сэргээсэн Трампын засаг захиргаанд талархал илэрхийлсэн. Гэвч Старлинк хиймэл дагуулын интернэтийн үйлчилгээг хязгаарласан үйлдлийг Трамптай сөргөлдсөний хариуд АНУ-ын зүгээс өөрт нь илгээсэн "сануулга" гэж үзэж байгаагаа илэрхийлжээ.

NBC телевизэд өгсөн ярилцлагадаа Оросын баллистик пуужингийн цохилтын талаар тагнуулын мэдээлэлд тавьсан хязгаарлалтаа АНУ цуцалсныг тэр баталсан байна.

"Энэ мэдээлэл тодорхой хугацаанд хаалттай байсан. Харин дараа нь Америкийн тал үүнийг нээж өглөө. Бид үүнд маш их талархаж байна. Одоо бүх зүйл хэвийн ажиллаж байна" гэж Зеленский "Meet the Press" нэвтрүүлэгт оролцохдоо ярьжээ.

Өвөл ойртож буй энэ үед Орос Украйны эрчим хүчний дэд бүтцэд баллистик пуужингаар довтолж байгаа бөгөөд тэдгээрийг урьдчилан мэдэж, хамгаалах арга хэмжээ авахад АНУ-ын тагнуулын мэдээлэл чухал ач холбогдолтой.

"Орос улс баллистик пуужин харвах үед бидэнд урьдчилан мэдэх боломж олгодог, чухал тагнуулын мэдээлэл зөвхөн АНУ-д л байдаг. Гэтэл сүүлийн гурван өдөр үргэлжилсэн баллистик пуужингийн дайралтуудын үеэр бид ийм мэдээлэл аваагүй" гэж тэр хэлсэн байна.

Украинд ашиглагдаж буй Старлинк терминалуудын ажиллах хурдыг гэнэт хязгаарлаж, фронтын шугам дээр дроны ажиллагаа болон агаарын довтолгооноос хамгаалах зарим үүрэг даалгаврыг гүйцэтгэхэд саад учруулсан үйлдлийн ард Илон Маскийн SpaceX компани байсан гэж Зеленский үзэж байгаагаа илэрхийлжээ.

"Хурдыг хязгаарлах шийдвэр нь Америкийн засгийн газраас бидэнд ирсэн 'дохио' байсан. Техникийн хувьд үүнийг SpaceX гүйцэтгэсэн" гэж тэр хэлсэн юм.

Трамп сүүлийн үед Москватай харилцаагаа сайжруулахыг эрмэлзэж, Оросоос дизель түлш импортлох гэрээ байгуулж, Конгрессын хоёр танхимаас олонхын саналаар баталсан хориг арга хэмжээнүүдийг цуцалсан нь Зеленскийтэй харилцах харилцааг нь муутгасан.

Мөн АНУ-ын зүгээс Украинд шахалт үзүүлж, Оросын газрын тос боловсруулах үйлдвэрүүдэд довтлохоо зогсоох, Путины тавьсан нөхцөлөөр дайныг хурдан дуусгахыг шаардаж байгаатай холбоотойгоор Трампын үйлдлүүдийг Зеленский улам бүр шүүмжлэх болсон.

"Бид түүнд итгэхийг хүсэж байна, тэр шийдвэрээ өөрчилнө гэж найдаж байна. Энэ бүхэн бүгд буруу, бидэнд ч АНУ-д ч тус болохгүй гэж би бодож байна" гэж тэр Трампын үйлдлүүдийн талаар байр сууриа илэрхийлсэн байна.

АНУ-ын сангийн сайд Скотт Бессент өчигдөр NBC телевизэд өгсөн тусдаа ярилцлагадаа Старлинкийн үйлчилгээг хязгаарласан явдлын ард Трампын засаг захиргаа байгаа гэж Зеленскийн хэлснийг "бодлогогүй үг" хэмээн шүүмжилжээ.

"Ерөнхийлөгч Трамп болон төрийн нарийн бичгийн дарга Рубио нар манай засаг захиргааны хэн ч ийм зүйл хийгээгүйг эрс хатуу мэдэгдсэн. Ерөнхийлөгч Зеленский ингэж буруутгаж байгаа нь маш бодлогогүй үйлдэл гэж би үзэж байна" гэж тэр хэлсэн байна.

Тэрбээр цааш нь "Ерөнхийлөгч Зеленский үнэнд нийцэхгүй ийм мэдэгдэл хийхдээ маш болгоомжтой байх хэрэгтэй" гэж анхааруулжээ.

Ням гарагийн орой Трамп өөрийн сошиал хуудсанд бичихдээ Оростой дөрвөн жил гаруй үргэлжилж буй дайныг дуусгахыг Зеленский хүсэхгүй байгааг шүүмжилсэн байна.

Тэрээр Орос, Украины хооронд энхийн хэлэлцээр хийхээр ажиллаж, "томоохон ахиц дэвшил" гаргаж байгаа ч "Зеленскийд энэ огт хамаагүй бололтой. Шулуухан хэлэхэд Европын орнуудын түүнд өгч буй их хэмжээний мөнгөний улмаас тэр энэ дайныг зогсоохыг хүсэхгүй байна. Магадгүй хэзээ ч хүсэж байгаагүй биз" хэмээн мэдэгджээ.