Засгийн газрын хуралдаан: Нөмрөгийн түймэр, цахим мөрийтэй тоглоом зэрэг 16 асуудал хэлэлцэнэ

Засгийн газрын хуралдаан 8 цагт эхэлж, үргэлжилж байна. Хуралдаанаар дараах асуудлуудыг хэлэлцэхээр төлөвлөсөн.

Тухайлбал, цахим мөрийтэй тоглоом зохион байгуулах гэмт хэргийн нөхцөл байдал, тэмцэх чиглэлээр авч хэрэгжүүлэх ажил, арга хэмжээний талаар, мөн Нөмрөгийн дархан цаазат газарт гарсан ой, хээрийн түймрийн улмаас байгаль орчинд учирсан хохирлын нөхцөл байдлын талаар хэлэлцэнэ.

Түүнчлэн хүрэн баавгай суурьшлын бүсэд нэвтэрч байгаатай холбогдуулан авч хэрэгжүүлж байгаа арга хэмжээ, сэргээгдэх эрчим хүчний төслүүдийг өрсөлдөөнт сонгон шалгаруулалт буюу аукционы зарчмаар хэрэгжүүлж байгаа ажлын явц, үр дүнгийн талаар хэлэлцэхээр жагсаалтад орсон байна.

Мөн “100 мянган айлын орон сууц” үндэсний хөтөлбөрийг хэрэгжүүлэх асуудал, “Тогтоолд өөрчлөлт оруулах тухай” Засгийн газрын тогтоолын төсөл, “Монголын хөрөнгийн биржийн талаар авах арга хэмжээний тухай” Засгийн газрын 2014 оны 152 дугаар тогтоол, “Албан татвар төлөх хугацааг сунгах тухай” Засгийн газрын тогтоолын төсөл зэргийг хэлэлцэнэ.

Төв аймгийн Баянжаргалан сумын нутаг дэвсгэрт Бөөрөлжүүтийн нүүрсний уурхайг түшиглэн баригдаж байгаа 600 МВт-ын цахилгаан станцын 2 дугаар үе шатны 300 МВт-ын төслийн талаар ч ярилцана.

Хуралдаанаар Улсын Их Хурлын гишүүн Р.Сэддоржийн санаачлан боловсруулсан Төв банк /Монголбанк/-ны тухай хуульд нэмэлт, өөрчлөлт оруулах тухай хуулийн төсөлд Засгийн газраас өгөх санал, дүгнэлтийг хэлэлцэхээр төлөвлөсөн. Мөн Улсын Их Хурлын гишүүн Ө.Шижирийн санаачлан боловсруулсан Монгол Улсын Их Хурлын сонгуулийн тухай хуульд нэмэлт, өөрчлөлт оруулах тухай хуулийн төсөлд Засгийн газраас өгөх санал, дүгнэлтийг хэлэлцэнэ.

Түүнчлэн Эд хөрөнгийн эрхийн улсын бүртгэлийн тухай хуульд нэмэлт, өөрчлөлт оруулах тухай хуулийн төсөл, “Үүрэг хүлээсэн хэрэглэгчийн эрчим хүчний хэрэглээний босго хэмжээг шинэчлэн тогтоох тухай” Засгийн газрын тогтоолын төсөл, мөн “Үүрэг хүлээсэн хэрэглэгчийн эрчим хүчний хэрэглээний босго хэмжээг шинэчлэн тогтоох тухай” Засгийн газрын 2023 оны 67 дугаар тогтоолыг хэлэлцэнэ.

“Төсвийн хөрөнгө оруулалтаар хэрэгжүүлж байгаа төсөл, арга хэмжээний талаар авч хэрэгжүүлэх зарим арга хэмжээний тухай” Улсын Их Хурлын 2026 оны 31 дүгээр тогтоолын дагуу хийсэн судалгааны үр дүнгийн талаар, “10 аймгийн төвийн дулааны станц барих төсөл”-ийн зээлийн гэрээг дуусгавар болгох ажлын явцын талаар ч хэлэлцэх аж.