Япон НҮБ-ын шинэ газрын зураг дээр Курилийн арлуудыг Оросын нутагт харуулсныг засахыг шаарджээ

НҮБ-ын Ерөнхий ассамблей өнгөрсөн долоо хоногийн Баасан гарагт дэлхийн газрын зургийн шинэчилсэн хувилбарыг албан ёсны болгох тогтоол баталсан. Уг тогтоолыг дэмжсэн 164 улсын нэг нь Япон боловч шинэ газрын зурагт маргаантай Курилийн арлуудыг ОХУ-ын нутаг дэвсгэртэй ижил өнгөөр дүрсэлсэн нь асуудал дагуулжээ.

Японы засгийн газрын "Умард нутаг" гэж нэрлэдэг өмнөд Курилийн дөрвөн арлыг ОХУ-ын газар нутгийн нэг хэсэг мэт харуулсныг засах шаардлагыг зураг бүтээгчдэд тавьсан байна.

16 дугаар зуунд бүтээгдсэн Меркаторын газрын зурагт Умард туйлд ойрхон тивүүдийг бодит байдлаас томруулж үзүүлдэг байсан бол "Equal Earth" нэртэй шинэ зурагт уг гажуудлыг зассанаар өмнө нь том харагддаг байсан тивүүд бодит хэмжээндээ хүрч, экваторын ойролцоох тивүүд илүү том харагддаг болсон.

Өнгөрсөн долоо хоногийн НҮБ-ын санал хураалтад Украин түдгэлзсэн нь Крымийн хойгийг тус улсын бусад газар нутгаас өөр өнгөтэй дүрсэлсэнтэй холбоотой байв. НҮБ-д суугаа Украины төлөөлөгч үүнийг олон улсын эрх зүйг зөрчсөн, "Пандорагийн хайрцгийг нээх" үр дагавартай үйлдэл хэмээн анхааруулжээ.

Японы засгийн газрын хэвлэлийн төлөөлөгч Минорү Кихара өчигдөр мэдэгдэлдээ "Equal Earth" газрын зургийн төсөл "Японы засгийн газрын байр суурьтай зөрчилдөхүйц дүрслэл агуулсан" гэж тайлбарласан.

"Бид уг газрын зургийг бүтээсэн байгууллагад дипломат шугамаар эсэргүүцэл илэрхийлж, уг дүрслэлийг засахыг шаардсан" гэж Кихара сэтгүүлчдэд хэлсэн байна.

Тэрбээр уг асуудал хэзээ засгийн газрынх нь анхааралд орсныг хэлээгүй ч Япон улс "өөрийн нутаг дэвсгэр болон газар зүйн нэршлийн талаарх буруу ойлголт тархахаас сэргийлэх үүрэгтэй" гэж мэдэгджээ.

Дээрх дөрвөн арлыг 1945 онд Зөвлөлт Холбоот Улсын арми эзэлж, тухайн үед амьдарч байсан япон иргэдийг албадан гаргасан гэдэг.

Өнгөрсөн сард ОХУ-ын ерөнхийлөгч Владимир Путин эдгээр арлуудын нэгэнд анх удаа зочлоход Япон улс Токио дахь элчин сайдыг нь дуудан эсэргүүцэл илэрхийлж байв. Ерөнхий сайд Санае Такаичи уг айлчлалыг "Японы ард түмний зүрх сэтгэлийг шархлуулсан", "огт хүлээн зөвшөөрөх боломжгүй" үйлдэл хэмээн мэдэгдэж байжээ.

Тэрбээр эдгээр арлууд нь "түүхийн болон олон улсын эрх зүй үүднээс Японы нутаг дэвсгэрийн салшгүй хэсэг" болохыг онцолсон байна.