Вьетнамын шүүх хар тамхины хэргээр 11 хүнд цаазын ял оноожээ

Вьетнамын шүүх хар тамхины наймааны томоохон хэргийн шийдвэрт 11 хүнд цаазаар авах ял оноожээ.

Тус хэрэгт нийт 227 хүн буруутгагдсанаас ихэнх нь 18 сараас эхлэн бүх насаар хорих ял сонссон байна.

Цаазын ял хүртсэн хүмүүсийн дотор уг наймааны гол зохион байгуулагч гэгддэг Ха Дан Нам бий. Мөрдөн байцаагчид түүнийг Францаас Вьетнамд хар тамхи нэвтрүүлэхийг удирдаж байсныг тогтоожээ.

Энэ хэрэг 2023 оны гуравдугаар сард Парисаас Хо Чи Мин хотод ирсэн Vietnam Airlines компанийн нисгэгчгүй онгоцны бүхээгийн ажилтан 157 шүдний оонд нуусан 10 кг гаруй хар тамхи тээж яваад баригдсанаар ил болсон юм. Тэрбээр MDMA, кетамин зүйлийн бодис тээж явснаа мэдээгүй гэдэг үндэслэлээр ялгаас чөлөөлөгдсөн.

Ха Да Нам нь кофе, угаалгын нунтаг, хүнсний нэмэлт зэрэг өдөр тутмын бараанд нуусан хар тамхийг Францаас Вьетнам руу хүргэх ажлыг зохион байгуулж байсан. Тэрбээр зорчигч, нисгэгчдийн ачаа болон илгээмжийг ашигладаг байсан бөгөөд голчлон Францад амьдардаг Вьетнам иргэдийг онилжээ.

Прокурорууд уг үндэстэн дамнасан сүлжээ нууц мессенжер хуудас, бусдын нэрээр нээсэн банкны данс хэрэглэж байсныг илрүүлсэн. Энэ сүлжээгээр нийт 29 их наяд дон буюу 1.1 тэрбум ам.доллар дамжсан гэнэ.

Шүүх оролцогч бүрд тус сүлжээнд гүйцэтгэсэн үүргийн дагуу ял оноосон. Жишээ нь, Вьетнамд орж ирсэн хар тамхийг худалдан авах, борлуулах, тээвэрлэх ажлыг зохион байгуулсан 20 хүн бүх насаар хоригдох ял сонссон.

Хүний эрхийн байгууллагуудын мэдээлснээр, Вьетнам цаазын ял хэвээр хэрэглэдэг дэлхийн 54 орны нэг. Тус улсын засгийн газар хоригдлуудынх нь тоог нууцлах болсон ч хүний эрхийн байгууллагууд 1,000 гаруй хүн цаазын ял хүлээж байна гэж тооцдог.

Сарын өмнө Вьетнамын засгийн газар хар тамхи наймаалах зэрэг зургаан төрлийн гэмт хэргийг цаазын ялаас чөлөөлөх санал гаргасан ч энэ нь хэрэгжиж эхлээгүй байна. 2025 онд эрүүгийн хуулийг шинэчлэхдээ эд хөрөнгө завших, тагнуулын ажиллагаа явуулах, засгийн газрыг түлхэн унагаах оролдлогын төлөөх ялыг хүртэл хасч байсан.

Сүүлийн үеийн хамгийн шуугиантай цаазын ялтай хэрэг бол төрийн банкны мөнгийг хувьдаа завшсан Чуон Ми Лангийн хэрэг юм. Тэрбээр 2024 онд дээд ял авсан ч дараа жилийн хуулийн өөрчлөлтөөр ял нь бүх насаар хорих болон буурсан.