Ургац хураалтад 2,300 цэргийн алба хаагч, 500 гаруй оюутныг сайн дураар оролцуулахаар болжээ

2026 оны ургацын комиссын хуралдаан өнөөдөр болж, ургац хураалтыг богино хугацаанд шуурхай зохион байгуулах, цаг агаарын эрсдэлээс ургацыг хамгаалах чиглэлээр холбогдох байгууллагуудад үүрэг чиглэл өгсөн гэж Хүнс, хөдөө аж ахуй, хөнгөн үйлдвэрийн сайд Ц.Идэрбат олон нийтийн сүлжээнд мэдээлсэн байна.

Тэрбээр хүн хүч нэмэгдүүлэх, техник, шатахууны бэлэн байдал хангах, төмс, хүнсний ногооны борлуулалтыг дэмжих, тариалангийн бүсийн зам, эрчим хүчний тасралтгүй байдлыг хангахад онцгой анхаарахыг үүрэг болгосон.

Ургац хураалт, хадлан тэжээлд шаардлагатай 12 мянган тонн шатахууны нөөц бүрдүүлж, тасралтгүй хангахаар болсон бол 2,300 цэргийн алба хаагч, 500 гаруй оюутан, залуус ургац хураалтад сайн дурын үндсэн дээр оролцохоор болжээ.

Мөн ургацыг мал, амьтнаас хамгаалах, хураасан ургацын мэдээг үнэн зөв, шуурхай гаргахыг орон нутагт үүрэг болгосны зэрэгцээ цаг агаарын хүйтрэлтээс өмнө ургацыг технологийн хугацаанд бүрэн хураан авах зохион байгуулалтыг эрчимжүүлэхээр төлөвлөжээ.

Энэ жилийн ургацын болц харьцангуй жигд байгаа ч ургац хураалт өмнөх жилүүдээс 5–10 хоногийн хойно эхэлж байгаа тул богино хугацаанд эрчимтэй ажиллах шаардлагатай гэж сайд онцолсон байна.

Энэ оны ургацын урьдчилсан балансаар 555.3 мянган тонн үр тариа, үүнээс 497.1 мянган тонн улаанбуудай, 168.2 мянган тонн төмс, 218.4 мянган тонн хүнсний ногоо, 50.4 мянган тонн тосны ургамал, 201.8 мянган тонн малын тэжээлийн ургамал тус тус хураан авах төлөвтэй байна.

Балансаас харахад хэрэгцээт хүнсний улаанбуудай, төмсийг 100 хувь, хүнсний ногооны 70 хувийг дотоодын ургацаас хангах боломж бүрдэж байгаа аж. Засгийн газраас 2026 оны намрын ургацаас 100 мянган тонн хүнсний улаанбуудай, анх удаа улсын хэмжээнд 12 мянган тонн төмс, хүнсний ногооны нөөц бүрдүүлэхээр санхүүжилтийг төсвийн тодотголд тусгаад байна.

Гурилын үйлдвэрүүдэд улаанбуудай худалдан авахад хөнгөлөлттэй зээлийн эх үүсвэрийг шийдэж байгаа. Улсын хэмжээнд үр тариа хадгалах 557.3 мянган тоннын багтаамжтай элеватор бий. Одоогийн байдлаар гурилын үйлдвэрүүд болон ХААК ТӨХХК-д нийт 61.1 мянган тонн улаанбуудайн үлдэгдэлтэй байна.