Үндэсний их баяр наадмын цогцолборыг дөрвөн улирал ашиглахаар төлөвлөж байна

30 мянган хүний суудалтай "Үндэсний их баяр наадмын цогцолбор"-ыг зөвхөн наадмын үеэр төдийгүй жилийн дөрвөн улиралд спорт, урлаг, соёлын арга хэмжээ зохион байгуулах боломжтой байхаар төлөвлөж байна.

Монгол Улсын Шадар сайд Н.Номтойбаяр өнгөрсөн долдугаар сард Үндэсний их баяр наадмын үеэр "Хүй долоон худаг"-т уг цогцолборыг байгуулах төслийг танилцуулж, 2027 онд ашиглалтад оруулж, төр, хувийн хэвшлийн түншлэлээр хэрэгжүүлэхээр төлөвлөж байгаагаа мэдээлсэн.

Төслийн ажлын хэсэг анхдугаар хуралдаанаа хийж, зураг төсөл, хөрөнгө оруулалт, санхүүжилт, инженерийн дэд бүтцийн асуудлыг хэлэлцлээ.

Эхний ээлжид 30 мянган хүний багтаамжтай задгай цэнгэлдэх хүрээлэн барихаар урьдчилсан зураг төслийг боловсруулж, хөрсний судалгааг дуусгасан. Одоо нарийвчилсан зураг төсөл, техник, эдийн засгийн үндэслэл болон инженерийн дэд бүтцийн шийдлийг боловсруулах юм.

Мөн тогтмол үйл ажиллагаа зохион байгуулж, орлого олох боломжийг тооцон, менежментийг хувийн хэвшил хариуцах хувилбарыг авч үзэж байгаа аж.

Ажлын хэсгийн гишүүд хөрөнгө оруулалт, санхүүжилтийн механизмыг тодорхой болгож, бүтээн байгуулалтыг богино хугацаанд хэрэгжүүлэх шаардлагатайг онцоллоо.