Умард Солонгосын хүндийн өргөлтийн тамирчин Азийн Наадмаас гурван дэлхийн дээд амжилт тогтоов

Лхагва гарагт Азийн Наадмын эмэгтэйчүүдийн хүндийн өргөлтийн төрөлд Умард Солонгосын тамирчин Ри Сон Гүм дэлхийн гурван дээд амжилтыг зэрэг шинэчлэн тогтоож, улсдаа анхны алтан медалийг авчирлаа.

49 кг-ын жинд өрсөлдсөн тэрбээр Азийн Наадамд гурав дахь алтан медалиа хүртэж, энэ амжилтыг давтсан цөөн тооны тамирчны тоонд багтлаа.

28 настай, 140 см өндөр Ри огцом өргөлтийн шатанд 94 кг өргөсөн нь өмнөх дэлхийн дээд амжилтаас нэг килограммаар илүү үзүүлэлт болжээ. Улмаар түлхэлттэй өргөлтөд 116 кг, дараа нь 121 кг өргөж, дэлхийн дээд амжилтыг хоёр удаа шинэчлэв.

Түүний хоёр өргөлтийн нийлбэр 215 кг болж, өмнөх дэлхийн дээд амжилтыг 7 кг-аар ахиулсан байна.

Ри Азийн Наадмаас хүндийн өргөлтөөр гурван алтан медаль хүртсэн анхны эмэгтэй тамирчин боллоо. Өмнө нь Ираны Мохаммад Нассири (1966-1974), Өмнөд Солонгосын Ким Тэ Хён (1990-1998), Ираны Бехдад Салими (2010-2018) нар энэ амжилтыг давтсан бөгөөд одоогоор дөрвөн алтан медаль хүртсэн тамирчин байхгүй байна.

Ри анхны алтан медалиа 2018 онд Жакартад, хоёр дахь медалиа 2023 онд Ханжоуд хүртэж байв.

Түүний дараа нийлбэр 198 кг-аар Энэтхэгийн Мирабай Чану мөнгө, 191 кг-аар Индонезын Диана Три Вижаяна хүрэл медаль хүртжээ.

Эх сурвалж: AFP