Умард Солонгос, Оросыг холбосон анхны авто замын гүүр ашиглалтад орлоо

Умард Солонгос, Орос улсууд хоёр орныг холбосон анхны авто замын гүүрээ нээсэн байна. Түмэн гол дээгүүр баригдсан нэг километр урт, хоёр эгнээтэй энэхүү гүүрний нээлтэд ОХУ-ын Ерөнхий сайд Михаил Мишустин, БНАСАУ-ын Ерөнхий сайд Пак Тэ Сон нар видео холбоогоор оролцож, үг хэлсэн юм.

Нээлтийн арга хэмжээний үеэр гүүрээр туг далбаа мандуулсан ачааны машинууд зорчсон бол уг үйл явдлыг хоёр улсын стратегийн түншлэлийг гүнзгийрүүлэх чухал алхам гэж үзэж буй.

Түүхэн дэх анхны авто замын холболт

Москва, Пёнян хоёрын хооронд өмнө нь агаарын болон төмөр замын холбоо байсан ч авто зам хэзээ ч байгаагүй юм. 1959 оноос хойш хоёр улсын хилээр тээврийн хэрэгсэл нэвтрүүлэхдээ төмөр замын гүүрэн дээр банз дэвсгэж зам засдаг байжээ. Энэ гүүрний асуудлыг 2024 онд Путин Пёнянд айлчлах үеэр шийдвэрлэж, барилгын ажлыг өнгөрсөн оны дөрөвдүгээр сард эхлүүлсэн.

ОХУ-ын Ерөнхий сайд Михаил Мишустин хэлэхдээ, "Хил дамнасан тээврийн дэд бүтцийг өргөжүүлэх нь худалдаа, эдийн засаг, шинжлэх ухаан, технологи, соёлын хамтын ажиллагааг цаашид хөгжүүлэхэд хүчтэй түлхэц болно гэдэгт би итгэлтэй байна" гэсэн бол хоёр улсын харилцаа "урьд өмнө байгаагүй өндөр түвшинд" хүрснийг онцолсон байна. Тэрбээр шинэ гүүрийг зөвхөн инженерийн төсөл биш, харин "найрамдлын шинэ бэлгэдэл" гэж тодорхойлжээ.

Өдөрт 300 хүртэл машин зорчих хүчин чадалтай гүүр нь Владивостокоос Санкт-Петербург хүртэлх Оросын тээврийн коридорт хялбар нэвтрэх боломжийг олгож байгаа аж. Эхний шатанд зөвхөн ачааны машин зорчих бол оны сүүлээр бүрэн ашиглалтад орсны дараа зорчигч тээврийн үйлчилгээнд ашиглах юм.

Шинэ гүүрийг Умард Солонгосын анхны удирдагч Ким Ил Суны амийг 1946 онд аварсан гэгддэг Зөвлөлтийн цэрэг Яков Новиченкогийн нэрээр нэрлэсэн байна.