Уламжлалт анагаах ухааны туршилтын ангид 35 сурагч элсэв

АШУҮИС-ийн харьяа ерөнхий боловсролын ахлах сургуульд Монгол уламжлалт анагаах ухааны сургалттай туршилтын анги энэ хичээлийн жилээс эхэлж, 2026-2027 оны хичээлийн жилд уламжлалт анагаах ухааныг сонирхон сонгосон анхны 35 сурагч суралцаж байна.

Сургалт нь зөвхөн Улаанбаатар хотын сурагчдаар хязгаарлагдахгүй. Герман, Япон улсад амьдарч байсан монгол хүүхдүүд эх орондоо ирж 6 дугаар ангид элсэн суралцаж байгаа бол хөдөө, орон нутгаас олон сурагч ирж байна.

Тус сургууль дотуур байртай төрөлжсөн сургалтын орчин бүрдүүлж байгаагаараа онцлогтой бөгөөд орон нутгаас ирсэн сурагчид тогтвортой суралцах нөхцөл бүрдэж байна.

Боловсролын сайд сурагч бүрд Chromebook гардуулсан бөгөөд уламжлалт мэдлэг, өв соёлыг эзэмшихийн зэрэгцээ орчин үеийн технологийг ашиглан суралцах боломж бүрдэж байна.

Уламжлалт анагаах ухааны сургалтыг ерөнхий боловсролын түвшнээс эхлүүлэн, цаашид мэргэжлийн болон дээд боловсролын шатанд үргэлжлүүлэн суралцах боломжтой шаталсан тогтолцоог бүрдүүлэх зорилт хэрэгжиж байна. Сурагчид суурь мэдлэг, арга ухаантай танилцахын зэрэгцээ төрөлжсөн сургалтаар үргэлжлүүлэн суралцаж, эмнэлзүйн орчинд дадлага хийх боломж бүрдэх юм.

Монголчуудын олон үеэр уламжлагдан ирсэн үнэт өвийг шинэ үеийнхэнд өвлүүлэхийн зэрэгцээ шинжлэх ухаан, технологи, инновацтай хослуулан хөгжүүлэх шинэ үеийн сургалтын эхлэл тавигдлаа гэж Боловсролын Яамнаас мэдээлэв.