Улаанбаатарт түрээсийн дундаж үнэ: хоёр өрөө 1.93 сая, гурван өрөө 3.03 сая төгрөг

Үндэсний статистикийн хороо Улаанбаатар хотын түрээсийн орон сууцны дундаж үнийн мэдээллийг туршилтын тооцооллоор гаргажээ.

2026 оны наймдугаар сарын байдлаар нэг өрөө орон сууцны нэг сарын түрээсийн дундаж үнэ 1.40 сая төгрөг, хоёр өрөөнийх 1.93 сая төгрөг, гурван өрөөнийх 3.03 сая төгрөг байна.

Тооцооллыг Улаанбаатар хотын төвийн зургаан дүүргийн мэдээлэлд үндэслэн хийж, түрээсийн үнийг www.unegui.mn сайтаас авч байгаа аж. Мөн хүн амын төвлөрөл ихтэй байршлуудыг сонгон тооцдог байна.

Байршлаарх ялгаа

Байршлаар харвал 1-3 өрөө байр Сүхбаатар дүүрэгт 1.72-3.73 сая төгрөг байгаа нь хамгийн өндөр, Сонгинохайрхан дүүрэгт 1.06-1.72 сая төгрөг байгаа нь хамгийн хямд үнэ юм.

Баянгол дүүрэгт нэг өрөөний түрээс 1.3 сая, хоёр өрөөнийх 1.7 сая, гурван өрөөнийх 2.2 сая төгрөг байна.

Сүхбаатар дүүргийн Сүхбаатар талбай, 220 мянгат орчимд гурван өрөө орон сууцны түрээсийн дундаж үнэ 4.9 сая, хоёр өрөөнийх 3.2 сая төгрөгт хүрчээ.

Хан-Уул дүүргийн Зайсан цогцолбор, Ривер Гарден орчимд гурван өрөөний түрээс 4.06 сая, хоёр өрөөнийх 2.4 сая, нэг өрөөнийх 1.3 сая төгрөг байна.