Улаанбаатарт дүүжин замын тээврийн төсөл 85 хувьтай, туршилт удахгүй

Яармагаас Хархорин чиглэлд хэрэгжиж буй дүүжин замын тээврийн төслийн явц 85 хувьд хүрсэн байна. Одоогоор хоёр буудлын барилгын дотоод засал, системийн тохируулгын ажил хийгдэж байгаа бөгөөд барилга угсралтын ажил бүрэн дууссаны дараа системийн туршилт, тохируулга, зүгшрүүлэлтийн ажил гүйцэтгэх аж. Туршилтын хугацаанд зорчигч тээвэрлэхгүй бөгөөд кабин бүрийн багтаамжид дүйцэх 750 килограмм жинг ус болон шуудайтай элс ашиглан шат дараатай шалгах юм.

Пома группийн Монгол дахь төслийн менежер Алексис Гресселийн хэлснээр кабелийн замын тулгуур цамхаг, станц, гараашны байгууламжийг суурилуулж дуусаад цахилгааны системийг ажиллуулах, эхлүүлэх болон системийн туршилтын дараагийн үе шат руу шилжихэд бэлэн болжээ. 9, 10 дугаар сард аюулгүй байдлын шалгалтыг үе шаттайгаар хийх бөгөөд системийг бүрэн ашиглалтад оруулахаас өмнөх туршилт, шалгалтууд болно.

Барилгын хувьд бетон цутгалт, фасад суурилуулалтын ажил дуусах шатандаа орж, дотор болон гадна талын өнгөлгөө хийгдэж байна. Францаас нийт 98 кабин тээвэрлэн авчирч, эд ангиудыг угсарч, өлгүүр, хавчаар буюу grip-ийн хамт бүрэн угсарч гараашид байрлуулсан байна.

Кабелийн замын системийн бүх үндсэн хэсэг угсрагдаж дууссан тул туршилтын ажиллагааг эхлүүлэх гэж байна. Хамгийн түрүүнд үндсэн цахилгаан сүлжээнд холбох ажил хийгдэх бөгөөд энэхүү холболт ойролцоогоор нэгээс хоёр долоо хоногийн дотор хийгдэхээр хүлээгдэж байна. Цахилгаан тэжээл авсны дараа системийн эхний туршилтуудыг эхлүүлнэ гэж Алексис Грессел ярьжээ.

Яармагийн Арцатаас Хархорины Өнөр хороолол чиглэлд баригдаж буй дүүжин зам 4.2 километрийн урттай, хоёр зогсоолтой бөгөөд оргил цагийн үед 2,320 хүн тээвэрлэх хүчин чадалтай. Зорчигчдыг 22 км/цагийн хурдтайгаар 11 минутын хугацаанд хүргэх тооцоололтой.

Төслийг Франц улсын Засгийн газрын 51 сая ам.долларын нэн хөнгөлөлттэй зээлээр хэрэгжүүлж байгаа бөгөөд зээлийн хугацаа 40 жил, хүү нь жилийн 0.0076 хувь. Ашиглалтад орсноос хойш 12 дахь жилээс зээлээ төлж, 2035 он хүртэл үндсэн төлбөрөөс чөлөөлөх гэрээ байгуулжээ.