Улаанбаатарт анх удаа шөнийн марафон болж, 8.8 мянган хүн оролцож байна

Улаанбаатар хотод анх удаа шөнийн марафон зохион байгуулагдаж байна. Оролцогчид 19:00 цагийн үед Сүхбаатарын талбайгаас гараанаас гарсан байна.

Албаны эх сурвалжийн мэдээлснээр энэ удаагийн шөнийн марафонд нийт 8.8 мянган хүн оролцож байгаагаас 5 км-ийн зайд 1,694, 10 км-ийн зайд 1,794, 21 км-ийн зайд 5,349 хүн тус тус бүртгүүлжээ.

Гүйлтийн маршрут Сүхбаатарын талбайгаас эхэлж, Имарт худалдааны төвийн уулзвар, 120 мянгатын уулзвар, Маршалын гүүр, Цэцэрлэгт хүрээлэнгийн дугуйн замын төгсгөл хүртэл дөрвөн маршруттай байна. Оролцогчид 5, 10, 25 километрийн зайд гүйж байна.

Одоогийн байдлаар 5 болон 10 километрийн зайд гүйсэн хүмүүс бариандаа орсон бол 21 километрийн зайн гүйлт үргэлжилж байна.

Өдрийн марафон эрүүл мэндийн чиглэлтэй байдаг бол шөнийн марафон энтертайнмент, дуу хөгжим, DJ-ээрээ онцлогтой гэж эх сурвалж онцолжээ. Гүйлтийн маршрутын дагуу олон газарт хөгжим болон тохижилт хийсэн байна.

Шөнийн марафоны үеэр нийтийн тээврийн гурван чиглэлийн 24 автобусны чиглэлд өөрчлөлт орж, ШҮ:1 Таван шар-Офицеруудын ордон, ШҮ:3 Зунжин худалдааны төв-Сүхбаатарын талбай, ШҮ:2 Сүхбаатарын талбай-Архивын ерөнхий газар чиглэлд шөнийн 02:00 цаг хүртэл иргэдэд үйлчилнэ.