Улаанбаатар марафон 2026-д түрүүлсэн тамирчнаас допинг илэрчээ

Тавдугаар сарын 23-нд Улаанбаатар хотод зохион байгуулагдсан "Улаанбаатар марафон 2026" олон улсын гүйлтийн тэмцээний ялагч, Бүгд Найрамдах Кени Улсын тамирчин Серой Андерсон Сайтотигоос авсан допингийн хяналтын сорьцоос хориглосон бодис илэрснийг Монголын Үндэсний Допингийн Эсрэг Байгууллага мэдээлсэн.

Тус тэмцээнд гурван удаа түрүүлсэн Сайтоти энэ жил 42 км-ийг 02:17:38 цагт туулж тэргүүлсэн бол лабораторийн шинжилгээгээр түүнээс Триметазидин бодис илэрчээ. Триметазидин нь Дэлхийн Допингийн Эсрэг Агентлаг (WADA)-ийн Хориглосон жагсаалтын S4.4 ангилалд багтах бөгөөд тэмцээний үе болон тэмцээний бус үед хэрэглэхийг хориглодог.

Холбогдох үр дүнгийн удирдлагын ажиллагааг Дэлхийн Допингийн Эсрэг Дүрэм, Олон улсын үр дүнгийн удирдлагын стандарт болон Допингийн эсрэг үндэсний дүрмийн дагуу явуулж байгааг тус байгууллага мэдэгдэв.

Шинжилгээний сөрөг дүн нь дангаараа допингийн эсрэг дүрмийн зөрчил эцэслэн тогтоогдсоныг илэрхийлэхгүй бөгөөд тамирчинд тайлбар гаргах, Б сорьцын шинжилгээ хийлгэх болон үр дүнгийн удирдлагын ажиллагаанд оролцох эрхтэй.