УИХ-ын гишүүн Б.Мөнхсоёл ажлын тайлангаа танилцуулав

УИХ-ын гишүүн Б.Мөнхсоёл ажлын тайлангаа танилцуулж, чуулган, Байнгын хороо, ажлын хэсэгт ажилласан болон дотоод, гадаадын уулзалт, хэлэлцүүлэгт оролцсон үзүүлэлтүүдийг дурдав.

Тайланд дурдсанаар, тэрээр УИХ-ын чуулганы нэгдсэн хуралдаанд 80 хувь оролцсон бөгөөд 8 удаа гадаад томилолт, 9 удаа чөлөөтэй байжээ.

Мөн 14 хуулийн төслийг УИХ-ын нэр бүхий гишүүдийн хамт өргөн мэдүүлж, 21 ажлын хэсэгт ажилласан байна.

Түүнчлэн 66 Байнгын хорооны хуралдаанд оролцож, хууль боловсруулах 19 ажлын хэсгийн 51 хуралдаанд 100 хувийн ирцтэй оролцжээ.

Иргэд, төрийн болон төрийн бус байгууллагын төлөөлөлтэй 53 уулзалт, хэлэлцүүлэгт оролцож, олон улсын хамтын ажиллагааны 23 уулзалт, хэлэлцүүлэгт оролцсон байна. Мөн УИХ-ын асуулгын цагаар Ерөнхий сайдаас 2 удаа асуулга асуужээ.

Санаачилсан хууль, тогтоол

Тайланд өгүүлснээр, тэрээр Усны тухай хуульд нэмэлт, өөрчлөлт оруулах хуулийн төслийг боловсруулж, уг төсөлд гол усны онцгой хамгаалалтын бүсэд нийтийн зориулалттай дэд бүтцийн барилга байгууламж барихыг хориглохоор тусгажээ.

“Хог хаягдлын тухай хуулийн хэрэгжилтийг хянан шалгах, холбогдох шийдвэрийн төсөл боловсруулах, санал, дүгнэлт боловсруулан Засгийн газарт чиглэл өгөх тухай” УИХ-ын тогтоолыг батлуулсан бөгөөд 13 заалт бүхий уг тогтоолоор байгальд ээлтэй үйлдвэрлэлийг дэмжих, хог хаягдлыг дахин боловсруулах үйл ажиллагаанд хувийн хэвшлийн оролцоо, хөрөнгө оруулалтыг нэмэгдүүлэх, Хог хаягдлын тухай хуулийг шинэчлэн боловсруулах чиглэлийг Засгийн газарт өгсөн байна.

Жижиг, дунд аж ахуйн нэгжийн татварын дарамтыг бууруулах зорилгоор НӨАТ-ын тухай хуульд өөрчлөлт оруулж, НӨАТ төлөгчөөр бүртгэх борлуулалтын орлогын босго хэмжээг 50 сая төгрөгөөс 400 сая төгрөг болгон нэмэгдүүлэх саналыг УИХ-ын чуулганы хуралдаанд гаргаж, батлуулжээ.

Ажлын хэсэгт ажилласан хуулиуд

Тэрээр УИХ-ын Эдийн засаг, Төсөв, Байгаль орчин, хөдөө аж ахуйн байнгын хорооны гишүүний хувиар төсөв, санхүү, эдийн засаг, байгаль орчныг хамгаалах бодлогын хүрээнд 19 хуулийн ажлын хэсэгт ажиллаж, батлалцсан хуулиудаас:

• Төрийн болон орон нутгийн өмчит компанийн засаглалын тухай хууль: Төрийн болон орон нутгийн өмчит компаниудын засаглалыг олон улсын сайн туршлагад нийцүүлэн шинэчилснээр компанийн засаглал, хяналтын тогтолцоо, ил тод байдал, удирдлагын хариуцлага, бүтээмж, ашигт ажиллагаа, санхүүгийн үр ашгийн хэмжээ нэмэгдэж, бизнесийн орчин сайжрах эрх зүйн үндэс бүрдэнэ.
• Эдийн засгийн эрх чөлөөний тухай хууль: Эдийн засгийн эрх чөлөөний эрх зүйн баталгааг бэхжүүлэх, хувийн хэвшлийн өрсөлдөх чадварыг дээшлүүлэх, төрөөс эдийн засгийг зохицуулах эрх хэмжээ, хязгаарыг тодорхой болгож, тогтвортой, урьдчилан таамаглах боломжтой эрх зүйн орчныг бүрдүүлэхэд чиглэсэн.
• Хөрөнгө оруулалтын тухай хуульд нэмэлт, өөрчлөлт оруулах тухай хууль: Хөрөнгө оруулагчийн эрхийг хамгаалах, гадаадын хөрөнгө оруулагчдын хязгаарлалтыг багасгах, тогтворжуулах гэрчилгээний хугацааг нэмэгдүүлэхээр зохицуулж, хөрөнгө оруулалтын баталгаа, суурь зарчмыг олон улсын жишигт нийцүүлсэн.
• Зөвшөөрлийн тухай хуульд нэмэлт, өөрчлөлт оруулах тухай хууль: Аж ахуйн зарим үйл ажиллагааг мэдэгдлийн үндсэн дээр эрхлэх, бизнес эрхлэх зөвшөөрлийн дарамтыг бууруулах, тавигдах нөхцөл шаардлагыг хялбарчлах, 233 зөвшөөрлийг цахимаар олгохоор тусгаж бизнесийн орчныг сайжруулж, эдийн засгийн өсөлтийг дэмжих эрх зүйн үндэс бүрдэнэ.
• Нийгмийн даатгалын ерөнхий хуульд нэмэлт, өөрчлөлт оруулах тухай хууль: Тэтгэврийн тогтолцоог баталгаат тэтгэвэр, Нийгмийн даатгалын сангаас олгох тэтгэвэр, хуримтлалын тэтгэвэр гэсэн гурван давхаргат тогтолцоонд шилжүүлж, тэтгэврийн даатгалд хагас хуримтлалын тогтолцоог нэвтрүүлэхээр тусгасан.
• Байгаль орчинд нөлөөлөх байдлын үнэлгээний тухай хуульд нэмэлт, өөрчлөлт оруулах тухай хууль: Байгаль орчинд үзүүлэх сөрөг нөлөөллөөс нь хамааран үнэлгээний тогтолцоог эрсдэлд суурилсан байдлаар шинэчилж, бага эрсдэлтэй төслүүдийн зөвшөөрлийн шат дамжлагыг хөнгөвчиллөө.
• Монгол Улсыг 2026–2030 онд хөгжүүлэх үндсэн чиглэлийг хэлэлцэн баталж, эдийн засгийн тогтвортой өсөлтийг хангах, хувийн хэвшлийг дэмжих, хүний хөгжлийг сайжруулах, бүсчилсэн хөгжлийг эрчимжүүлэх, төрийн бүтээмж, засаглалыг дээшлүүлэх зорилтуудыг тодорхойлов.
• Ашигт малтмалын тухай хуульд нэмэлт, өөрчлөлт оруулах тухай хууль: Чухал ашигт малтмалын эрх зүйн орчныг боловсронгуй болгож, баяжуулалт болон маркшейдерийн үйл ажиллагааг тусгай зөвшөөрлийн тогтолцоонд хамруулан, эрэл хайгуулын судалгааг идэвхжүүлэх, байгаль орчны нөхөн сэргээлтийг сайжруулах, АМНАТ-ийн орлогоос Орон нутгийн хөгжлийн санд хуваарилах хувийг нэмэгдүүлэхээр тусгасан.

Өргөн мэдүүлсэн хуулийн төслүүд

2025 оны намрын чуулганы хугацаанд УИХ-ын даргад өргөн мэдүүлсэн хуулийн төслүүд:

• Тамхины хяналтын тухай хуулийн нэмэлт өөрчлөлтийн хуулийн төслийг нэр бүхий гишүүдийн хамт өргөн мэдүүлэв. /2025.09.19/
• Монгол Улсын Их Хурлын чуулганы хуралдааны дэгийн тухай хуульд нэмэлт, өөрчлөлт оруулах тухай хуулийн төслийг нэр бүхий гишүүдийн хамт өргөн мэдүүлэв. /2025.11.14/

2026 оны хаврын чуулганы хугацаанд УИХ-ын даргад өргөн мэдүүлсэн хууль, тогтоолын төслүүд:

• Хүүхдийн хөгжлийг дэмжих тухай хуулийн төслийг нэр бүхий гишүүдийн хамт өргөн мэдүүлэв. /2026.05.05/
• Улсын төсвийн хөрөнгө оруулалтаар төсөл, арга хэмжээг санхүүжүүлэх талаар авч хэрэгжүүлэх зарим арга хэмжээний тухай УИХ-ын тогтоолын төслийг нэр бүхий гишүүдийн хамт өргөн мэдүүлэв. /2026.05.07/
• Монгол Улсын Их Хурлын тухай хуульд нэмэлт өөрчлөлт оруулах, Эрчим хүчний хөгжлийн дэд хороо байгуулах тухай хуулийн төслийг нэр бүхий гишүүдийн хамт өргөн мэдүүлэв. /2026.05.27/
• Ойн тухай хууль (Шинэчилсэн найруулга)-ийн төслийг нэр бүхий гишүүдийн хамт өргөн мэдүүлэв. /2026.06.04/
• Төсвийн тогтвортой байдлын тухай хуульд нэмэлт оруулах тухай хуулийн төслийг нэр бүхий гишүүдийн хамт өргөн мэдүүлэв. /2026.06.10/
• Монгол Улсын засаг захиргаа, нутаг дэвсгэрийн нэгж, түүний удирдлагын тухай хуульд нэмэлт оруулах тухай хуулийн төслийг нэр бүхий гишүүдийн хамт өргөн мэдүүлэв. /2026.06.17/
• Монгол Улсын Үндсэн хуулийн цэцийн тухай болон Үндсэн хуулийн цэцэд маргаан хянан шийдвэрлэх тухай хуулийн төслийг нэр бүхий гишүүдийн хамт өргөн мэдүүлэв. /2026.06.29/