УИХ-ын ээлжит бус чуулган: Засгийн газрыг огцруулах хүсэлт, төсвийн тодотгол хэлэлцэнэ

УИХ-ын ээлжит бус чуулган өнөөдөр эхэлж, төсвийн тодотгол, сөрөг хүчний огцруулах хүсэлт зэрэг асуудлыг хэлэлцэнэ. Сөрөг хүчний зүгээс засгийн газрыг огцруулах хүсэлтэй байгаа бол эрх баригч нам дотроо хагаралтай байдалтай байна.

Ардчилсан намаас засгийн газрыг огцруулах өргөдөлд 42 гишүүнээс 41 нь гарын үсэг зурж, Ерөнхий сайдын төсвийн тодотголын хамт өргөн барьсан есөн шийдвэрийг “Есөн шид нь бүрдсэн шийдвэрүүд” гэж шүүмжилсэн. Намын зүгээс шийдвэрүүдэд бодлогын үнэлгээ хийсний үндсэн дээр “Есөн амлалт биш. Хоёр нь өмнө шийдэгдсэн, гурав нь тайлбар дутуу, гурав нь механизмаараа буруу, нэгийг нь засаглалаа зассаны дараа дэмжиж болох юм” гэж үзжээ.

МАН-ын гишүүд Н.Учрал тэргүүтэй 38 гишүүн, Д.Амарбаясгалан тэргүүтэй 30 гишүүнтэй бүлэгт хуваагдаад байна. Энэ удаагийн чуулганаар 2.2 их наядын алдагдалтай төсвийн тодотгол, зургаан сарын хугацаанд хэрэгжүүлсэн бодлого, огцруулах хүсэлт, эрх баригч намын дотоод хагарал зэргийг багтаасан хурцадмал хуралдаан болох төлөвтэй байна.