Ухань хотын дарга асан Жоу Шяньван авлигын хэргээр 14 жил хоригдож, 5 сая юанийн торгууль төлнө

Хэнань мужийн Шанцю хотын дунд шатны ардын шүүх Ухань хотын дарга асан Жоу Шяньванг авлигын хэргээр 14 жилийн хорих ял, 5 сая юанийн торгууль шийтгэж, хууль бусаар олсон хөрөнгийг нь улсын орлого болгох шийдвэр гаргажээ.

Шүүхийн дүгнэлтээр Жоу 2003-2025 оны хооронд Хуанши хотын намын хорооны нарийн бичгийн дарга, Ухань хотын дарга, Хубэй мужийн дэд захирагч зэрэг албан тушаал хашиж байхдаа компани, хувь хүмүүст төсөл авах, бизнесийн үйл ажиллагаа явуулах, захиргааны зөвшөөрөл авахад нь туслалцаа үзүүлж, 60.5 сая юаниас (9 сая доллар) дээш үнэ бүхий бэлэн мөнгө, эд хөрөнгө авсан болохыг тогтоосон байна.

Жоу гэм буруугаа хүлээн зөвшөөрч, хууль бусаар олсон хөрөнгөө буцаан төлсөн нь ялыг хөнгөрүүлэх үндэслэл болсныг шүүх тайлбарлажээ.

64 настай Жоуг өнгөрсөн оны долдугаар сард Хятадын авлигын эсрэг дээд байгууллага болох Сахилга Бат, Хяналтын Төв Хороо шалгаж эхэлсэн юм.

2018 оны тавдугаар сард Ухань хотын намын хорооны дэд нарийн бичгийн даргаар томилогдож, мөн оны есдүгээр сард хотын даргаар томилогдсон Жоу 2019 оны арванхоёрдугаар сарын сүүлчээр коронавирус анх илрэх үед мэдээллийг зарлахаа хойшлуулсан нь олон нийтийн шүүмжлэлд өртсөн.

2020 оны нэгдүгээр сарын 20-нд орон нутгийн удирдлагууд бүс нутгаа хариуцах үүрэг өгсний дараа гурав хоногийн дараа Ухань хотод хөл хорио тогтоосон нь оройтсон шийдвэрт тооцогдож байсан.

Мөн оны нэгдүгээр сарын сүүлчээр Жоу төрийн мэдлийн CCTV телевизэд өгсөн ярилцлагадаа "Орон нутгийн засаг захиргааны албан тушаалтны хувьд би мэдээллийг хүлээн авч, зөвшөөрөл авсны дараа л олон нийтэд мэдээлэх боломжтой" гэж тайлбарлаж байв.

Тэрбээр тухайн сарын эхээр 40 мянга гаруй хүн оролцсон сар шинийн баярын арга хэмжээг зохион байгуулсан нь вирусийн тархалтад нөлөөлсөн гэдэг.

Жоу шийдвэрээ хамгаалж байсан ч халдварын тархалтыг хяналтад авмагц Ухань хотын намын хорооны дарга асан Ма Гуоцяны хамт албан тушаалаасаа чөлөөлөгдөхөд бэлэн байгаагаа мэдэгдэж байжээ. Ма Гуоцян 2020 оны хоёрдугаар сард Хубэй мужийн намын хорооны дарга Жян Чаолянгийн хамтаар албан тушаалаасаа чөлөөлөгдсөн бол Жоу 2021 оныг хүртэл албан тушаалдаа үлдэж, ажлаа хүлээлгэн өгсний дараа улсын дээд түвшний улс төрийн зөвлөлдөх байгууллагын муж болон улсын хэмжээний хороодод үргэлжлүүлэн ажиллаж байжээ.

Хятад улсад үргэлжилж буй авлигын эсрэг тэмцлийн хүрээнд хамгийн сүүлд шийтгүүлсэн томоохон албан тушаалтнууд бол батлан хамгаалахын сайд асан Вэй Фэнхэ, Ли Шанфу нар бөгөөд тэдэнд тавдугаар сард тодорхой хугацаагаар хойшлуулсны дараа бүх насаар хорих ялаар солигдох нөхцөлтэй цаазын ял оногдуулсан юм.