Угсармал 59 орон сууцыг дулаалах ажил үргэлжилж, 4 нь дууссан

Улаанбаатар хотын угсармал орон сууцнуудыг орчин үеийн стандартад нийцүүлэн шинэчлэх төслийг Германы олон улсын хамтын ажиллагааны нийгэмлэг (GIZ) болон Улаанбаатар Хотын Захирагчийн Ажлын Алба (УБЗАА) хамтран хэрэгжүүлж байна.

УБЗАА-наас мэдээлснээр өнөөдрийн байдлаар угсармал 59 орон сууцыг дулаалах ажил гүйцэтгэгдэж, 4 орон сууцыг дулаалж дуусжээ.

Энэ онд угсармал орон сууцны дулаалгын төсөлд нийслэлийн төсвөөс 9.8 тэрбум төгрөг, Хот байгуулалт, барилга, орон сууцжуулалтын яамнаас өнгөрсөн жилийнхтэйгээ нийлээд 16.5 тэрбум төгрөг, GIZ 25.4 тэрбум төгрөгийн санхүүжилт гаргаж байна.

Оршин суугчдаас санхүүжилтийн 25 хувийг авдаг тул угсармал орон сууцыг дулаалахаас өмнө оршин суугчид болон СӨХ-ноос зөвшөөрөл авах шаардлагатай.

Гал дэмждэггүй эрдэс хөвөнгөөр дулаалж, металл фасад хийснээр барилгын ашиглалтын хугацааг 30 жилээр уртасгах, эрчим хүчний хэрэглээг бууруулах, иргэдийн амьдрах орчны тав тухыг сайжруулах зорилготой.

Улаанбаатар хотод нийт 1,077 блок угсармал орон сууц байгаа бөгөөд 2023 оноос эхлэн дулаалж эхэлжээ.

2025 оны байдлаар 370 блок орон сууцыг дулаасан бол 2025-2027 онд «Улаанбаатар хотын орон сууцны эрчим хүчний үр ашгийг дээшлүүлэх» төслийн хүрээнд нийт 210 орчим блок угсармал орон сууцыг дулаалахаар төлөвлөсөн бөгөөд 2025-2026 онд 115 блок орон сууцыг дулаалах юм.

Харин 2027 онд нийслэл хотын 200 орчим угсармал орон сууцыг шинэчлэхээр төлөвлөжээ.