УБТЗ-ийн 875-р км гармыг 24 цагийн жижүүртэй болголоо

"УБТЗ" ХНН төмөр замын 875-р км-ийн гармыг 24 цагийн жижүүрийн зохицуулалттай иж бүрэн гарам болгон тоноглож, иргэдийн аюулгүй зорчих нөхцөлийг хангасан талаар тус компанийн Хөдөлгөөний аюулгүй байдал хариуцсан орлогч дарга Ш.Нямсүрэн мэдээлэл өглөө.

Тэрбээр "Өнөөдөр УБТЗ-ийн 39 дүгээр зөрлөг болон Сайншанд өртөөний хоорон дахь 875-р км-ийн гармыг 24 цагийн жижүүрийн зохицуулалттай гарам болгон тоноглож ашиглалтад оруулж байна. Энэ бүтээн байгуулалтад УБТЗ-аас нийт 500 гаруй сая төгрөгийн хөрөнгө оруулалт хийж нийт гурван сарын хугацаанд барилга байгууламжийг барьж, байнгын ашиглалтад орууллаа" гэсэн юм.

Мөн тэрбээр уг гарам нь дээгүүр явж байгаа галт тэрэгний аюулгүй байдлыг хангахаас гадна орон нутгийн иргэдийн авто тээврийн хэрэгсэл, хүнд даацын машин, нийтийн тээврийн унааны аюулгүй байдлыг хангаж байгаагаараа онцлогтой гэдгийг онцлов. "Орон нутгийн иргэдийн аюулгүй байдал хангагдаж, энэ гармаар зорчих хөдөлгөөн саадгүй болж байна" гэж тэрбээр нэмж хэлэв.