Түрээсийн байрны залилангийн улирал эхэлж, гэрээ байгуулахыг анхааруулж байна

Их сургуулийн хичээл эхлэхтэй холбогдуулан түрээсийн байрны залилан ихэсдэг болжээ. Цагдаагийн байгууллагаас төлбөр төлөхөөс өмнө заавал гэрээ байгуулж, нотариатаар батлуулахыг зөвлөж байна.

Залилуулсан нэгэн иргэн гурван сарын хугацаатайгаар нэг өрөө байр түрээслэхээр 3 сая 300 мянган төгрөг шилжүүлсэн байна. Түрээслүүлэгч гадагшаа явах гэж байгаа учраас байраа түрээсэлж байгаа гэж хэлсэн ажээ. Тухайн үедээ ямар нэгэн гэрээ байгуулалгүй шууд л байранд нь орсон гэв.

Гурав хоногийн дараа байрны жинхэнэ эзэн ирэхэд, түрээсэлж байсан хүн нь надад давхар түрээсэлсэн юм байна гэдгийг мэдсэн гэж хохирогч ярьжээ.

Мөнгө шилжүүлсэн дансны хуулга байгаа ч гэрээ байгуулаагүй учраас мөнгөө олж авч чадаагүй байна.

Цагдаагийн урьдчилан сэргийлэх албаны ахлах мэргэжилтэн Ш.Жамъяндорж хэлэхдээ, нийт гэмт хэргийн 34 хувийг залилангийн гэмт хэрэг эзэлдэг гэв. Ялангуяа түрээсийн байрны залилангийн улирал эхэлж байгаа тул иргэд урьдчилгаагаа шилжүүлэхээс өмнө заавал гэрээ байгуулж, нотариатаар батлуулах хэрэгтэйг анхаарууллаа.

Залилангууд ихэвчлэн хямд үнээр, яаралтай, өөр хүний нэр барьж хийгддэг гэж тэрбээр хэлжээ.

Зах зээлийн үнээс хямдаар, гадагшаа явах гэж байгаа учраас яаралтай түрээсэлж байна зэргээр бусдын байрыг түрээслэх эсвэл өөр хүний тавьсан зарыг хуулж тавих зэрэг тохиолдол элбэг байдаг гэдгийг анхааруулж байна.