«Цусны даралт ихсэлтийн эсрэг аян-2026» Замын-Үүдэд эхэллээ

Зүрх судасны өвчнөөс урьдчилан сэргийлэх, иргэдийг үзлэг, оношилгоонд хамруулах, эрүүл мэндийн боловсрол олгох зорилготой «Цусны даралт ихсэлтийн эсрэг аян-2026» өнөөдөр Дорноговь аймгийн Замын-Үүд суманд нээлтээ хийлээ.

Энэ жил зургадугаар сард Архангай, Завхан аймагт хэрэгжүүлсэн аяны баг энэ сарын 28-29-нд Говьсүмбэр аймагт ажиллаж, 9-р сарын 30-наас 10-р сарын 1-ний өдрүүдэд Замын-Үүд сумын иргэдэд үйлчлэхээр ажиллаж байна.

Аяны хүрээнд зүрх судас, зүрхний шигдээс, мэдрэл, тархины цус харвалт, бөөр, хоол боловсруулах эрхтэний эмгэг зэрэг нарийн мэргэжлийн эмч нар зорилтот бүлгийн иргэдэд үзлэг хийж, зөвлөгөө мэдээлэл өгөхөөс гадна эрүүл мэндийн боловсролын сургалт зохион байгуулж байна. Иргэд өдөрлөгт ирснээр үзлэг, оношилгоонд хамрагдахын зэрэгцээ эрүүл мэндээ хянах, өвчлөлөөс урьдчилан сэргийлэх зөвлөмж авах боломжтой.

Аяны нээлтэд Замын-Үүд сумын Засаг дарга Б.Сайнбаяр, П.Н.Шастины нэрэмжит Улсын гуравдугаар төв эмнэлгийн Эмнэлзүй эрхэлсэн дэд захирал Б.Нандинцэцэг, ХААН Банкны Замын-Үүд салбарын захирал Д.Баярмаа нар оролцож, цусны даралт ихсэх өвчнөөс урьдчилан сэргийлэх, эрт илрүүлгийг нэмэгдүүлэхэд хамтын ажиллагааны ач холбогдлыг онцоллоо.

ХААН Банк, П.Н.Шастины нэрэмжит Улсын гуравдугаар төв эмнэлэг, Нийгмийн эрүүл мэндийн үндэсний төв, Монголын үндэсний олон нийтийн радио, телевиз хамтран 2017 оноос хойш хэрэгжүүлж буй энэхүү аяны хүрээнд өнгөрсөн есөн жилийн хугацаанд Монгол Улсын 21 аймгийг бүтэн тойрч, 72 гаруй мянган иргэнийг нарийн мэргэжлийн эмчийн үзлэг, оношилгоонд хамруулан, эрүүл мэндийн зөвлөгөө, мэдээллээр хангажээ.

Аяныг Замын-Үүд суманд анх удаа хэрэгжүүлж байгаа нь онцлог. Монгол Улсын өмнөд хилд орших тус сум нь цаг агаарын хуурай, эрс тэс уур амьсгалтай төдийгүй тээвэр ложистикийн зангилаа бүс тул автомашин ачаа тээврийн урсгал хамгийн өндөр байдаг.

Тус сумын иргэдийн эрүүл мэндэд хуурайшилт, тоосжилт, цаг уурын эрс тэс нөхцөлөөс гадна хөдөлмөр эрхлэлт, амьдралын хэв маяг зэрэг олон хүчин зүйл нөлөөлөх боломжтойг эмч нар дурдав. Хүн амын төвлөрөл болон хил, тээвэр, худалдааны үйл ажиллагаа эрчимтэй явагддаг энэ бүсэд урьдчилан сэргийлэх үзлэг, эрт илрүүлэг, эрүүл мэндийн боловсролын арга хэмжээг тогтмол зохион байгуулах шаардлагатайг тэд онцолж байна.

Энэ удаагийн аян нь иргэдийн цусны даралт, зүрх судасны эрсдэлийг эрт илрүүлэх, зорилтот бүлгийн иргэдийг нарийн мэргэжлийн үзлэг, оношилгоонд хамруулах, эрүүл мэндийн боловсролыг дээшлүүлэхэд чухал ач холбогдолтой юм.