Цагаан ордон Тетрис загварын 'Build the Wall' тоглоомыг буулгажээ

АНУ-ын ерөнхийлөгчийн Цагаан ордон өнгөрсөн долоо хоногт нээсэн улс төрийн агуулгатай видео тоглоомуудын нэг болох “Build the Wall” тоглоомыг вэб сайтаасаа буулгажээ. Энэ тоглоом нь дэлхийд алдартай Тетрис тоглоомыг дуурайсан хийцтэй байсан юм.

Цагаан ордон “Хилээ хууль бус нэвтрэгчдээс хамгаалъя” уриатай хана өрдөг тоглоомыг яагаад буулгасан тайлбарлаагүй ч, Тетрис компани дөрөв хоногийн өмнө энэ тоглоомыг бүтээхэд оролцоогүй, зөвшөөрөл олгоогүй гэж мэдэгдэж байв.

Тетрис компани “Build the Wall тоглоомыг бүтээхэд оюуны өмчийн зөвшөөрөл олгоогүй” гэж анхааруулсан. Хууль эрх зүйн арга хэмжээ авах эсэхийг асуухад тус компани “одоохондоо энэ асуудлыг судалж байна” гэж хариулсан бол “Тетрис компани хүмүүсийг хуваах биш нэгтгэх нь илүү хүчтэй гэдэгт итгэдэг. Оюуны өмчийн зөрчлийг маш нухацтай авч үздэг” гэж мэдэгдсэн.

Цагаан ордон Пүрэв гарагт нээсэн тоглоомын хуудас нь оюуны өмч, арьс өнгөний үзэл зэргийн улмаас шүүмжлэлтэй тулгарсан. Тоглоомууд болон танилцуулга видеонуудад Sega, Microsoft Xbox, Flappy Bird Foundation зэрэг брэндүүдийг санагдуулам дүрслэл олон харагдаж байв. Цагаан ордон тоглоомын хуудсаа “Манай засаг захиргаа ерөнхийлөгчийн олон амжилтын түүхийг Америк хүн бүрд таалагдах, шинэлэг байдлаар өгүүлэх арга замуудад анхаарлаа хандуулж байна” гэж танилцуулж байсан юм.