«Цагаан хадны өнгө» баримтат кино Улаанбаатарт нээлтээ хийлээ

Монголын нүүрс тээврийн цөөн эмэгтэй жолоочийн нэг С.Майхүүгийн амьдралын төлөөх тэмцлийг зургаан жилийн турш баримтжуулсан «Цагаан хадны өнгө» баримтат кино 2026 оны аравдугаар сарын 19-нд Улаанбаатар олон улсын кино наадмын үеэр албан ёсны нээлтээ хийлээ.

Найруулагч Ч.Хоролдорж уг бүтээлийг Францын "Petite Maison Production" болон Монголын "iCity Films"-ийн хамтаар бүтээсэн. Кинонд эрчүүдтэй мөр зэрэгцэн ажиллаж, хүүхдүүдийнхээ ирээдүйн төлөө эрсдэл ихтэй, нийгмийн болон эрүүл мэндийн хамгаалалтгүй орчинд амьдарч буй эмэгтэй жолоочийн түүхийг харуулсан.

Уг бүтээл 2026 оны зургаадугаар сараас олон улсын үзэгчдэд хүрч эхэлсэн бөгөөд Нью-Йоркийн "Трайбека" болон Их Британийн "Шеффилд ДокФест" наадмын уралдаант хэсэгт сонгогдож, Цюрихийн кино наадмаас Filmpreis der Zürcher Kirchen шагнал хүртсэн. Мөн Бусаны олон улсын кино наадмын Wide Angle хөтөлбөрт шалгарчээ.

Киноны зураг авалтыг Өмнөговь аймгийн Тавантолгой, Нарийн сухайт нүүрсний орд газрууд, Ханбогд сумын нутаг дахь "Цагаан хад" суурин болон нүүрс тээврийн замуудын бодит орчинд хийсэн.

Найруулагч Ч.Хоролдорж өмнө нь «Зүүд» (2010) богино хэмжээний киногоороо Каннын кино наадмын Short Film Corner-д, «Шарга даага» (2013) уран сайхны киногоороо Бусан, Фрибургийн наадмуудад оролцож, «Говийн бүсгүй» (2023) бүтээлээрээ Британийн Grierson Award-аас "Шилдэг богино хэмжээний баримтат кино"-ны шагнал хүртэж байсан.

Тун удахгүй энэхүү бүтээл бүх IPTV платформуудаар үзэгчдийн хүртээл болох юм байна.