Ц.Баатархүү: АН-ын тамга байдаг газартаа л байгаа

Ардчилсан намын бүлэг өнөөдөр шинэ даргаа сонгоно. Өнгөрсөн долоо хоногт Ц.Баатархүү гишүүн намын тамгыг авч зугтсан гэх мэдээлэл тархсан билээ.

Тэрээр энэ талаар тайлбар өгсөн:

Ц.Баатархүү: Ардчилсан намын бүлэг маш эв нэгдэлтэй байгаа. Тамга байдаг газартаа л бий.

Мөн тэрээр МАН-ын зүгээс Ардчилсан намын бүлгийг албан тушаалын хэрүүлтэй гэж худал мэдээлэл тарааж, хагаралдуулах зорилготой байгааг дурдлаа. "МАН-ын зовлон бол төрийн зовлон болсон. МАН, АН хоёрыг адилхан гэдэг агуулгыг маш их түгээдэг, тийм биш" гэж тэрээр хэллээ.

Ц.Баатархүүгийн хэлснээр, эрх баригч нам сайдаа солих асуудлаар шөнөжин хуралддаг хэр нь цалин, тэтгэвэр нэмэх болохоор хурлын ирц хүрдэггүй. Иймд АН иргэдийн амьжиргааг сайжруулах, тогтоолын төсөл өргөн барьж байна.

Албан ёсоор О.Цогтгэрэл дарга өргөдлөө өгөөгүй учраас нэр дэвшигчид албан ёсоор тодроогүй байгаа. Санал хураалт болбол намын гишүүд бүгд оролцож, дараа нь хэвлэлд яриа өгнө гэдгийг тэрээр мэдэгдлээ.