Трамп Зеленскийг дайныг зогсоох боломжийг ашиглаагүй гэж буруутгаж, Украинд шинэ ерөнхийлөгч хэрэгтэй гэв

АНУ-ын ерөнхийлөгч Дональд Трамп Украины ерөнхийлөгч Володимир Зеленскийг дайныг зогсоох олон боломжийг ашиглаагүй гэж буруутгаж, түүнийг солихыг уриалсан байна.

Цагаан ордны гадаа сэтгүүлчдэд хэлсэн үгэндээ тэрбээр: "Украин улс шинэ ерөнхийлөгчтэй болох цаг нь болсон гэж би бодож байна. Зеленский энэ дайныг олон удаа, үнэхээр олон удаа шийдвэрлэх боломжтой байсан ч тэгэхийг хүсээгүй" гэжээ.

Украины ард түмэн дайныг зогсоох яриа хэлэлцээ хийх чадвартай шинэ удирдагчийг сонгох хэрэгтэй гэж Трамп мэдэгдсэн байна.

"Тэд хэлэлцээ хийж чадах шинэ удирдагчтай болоосой гэж би бодож байна. Учир нь тэр хэлэлцээ хийх олон боломж байсан ч ямар нэгэн шалтгаанаар огт ашиглаагүй" гэж Трамп хэлсэн юм.

Түүний энэ мэдэгдэл нь Оросоос дизель түлш худалдаж авах шийдвэрийг Зеленский шүүмжилсний дараа гарч байна. Трамп Конгрессын завсрын сонгуулиас өмнө эрчим хүчний үнийн өсөлтийг бууруулах зорилгоор Оросын газрын тосны бүтээгдэхүүнд тавьсан худалдааны хоригоо түр цуцалсан бөгөөд Зеленский үүнийг "мөргөлдөөнийг улам сунжруулж, Москвагийн дайны санхүүжилтийг дэмжсэн алхам" гэж үзсэн юм.

Трамп өмнө нь дэлхийн болон АНУ-ын зах зээлд дизель түлшний үнэ өсөхөд Оросын газрын тос боловсруулах үйлдвэрүүдэд Украины талаас явуулж буй агаарын цохилтууд нөлөөлсөн гэж буруутгаж байсан бөгөөд боловсруулах үйлдвэрүүдийг онилохгүй байхыг Зеленскийд дахин анхааруулжээ.

"Хүссэнээ хий. Гэхдээ боловсруулах үйлдвэрүүдийг бүү онил. Өөр олон бай байгаа шүү дээ. Боловсруулах үйлдвэрүүдийг бүү онил" гэж Трамп хэлжээ.

Орос улс 2022 оны хоёрдугаар сард Украины эсрэг эзлэн түрэмгийлэх дайныг эхлүүлсэн бөгөөд ОХУ-ын ерөнхийлөгч Владимир Путин болзолгүйгээр гал зогсоох саналуудыг удаа дараа няцааж, АНУ-ын тэргүүлсэн дипломат санаачилгууд ахиц дэвшил авчраагүй байна.