Трамп Цагаан ордны нэвтрэх эрхийг хориглосны улмаас АНУ-ын телевизүүд түүний мэдээг түр зогсоов

АНУ-ын томоохон телевизийн сувгууд Даваа гарагаас эхлэн ерөнхийлөгч Дональд Трампын оролцсон үйл явдлуудыг сурвалжлахаа түр зогсоожээ. Шалтгаан нь өнгөрсөн долоо хоногт Трампын шийдвэрээр хэвлэл мэдээллийн гурван том агентлагийн ажилтнуудыг Цагаан ордонд нэвтрүүлэхийг хориглосонтой холбоотой.

Хоригт CNN, MS NOW суваг болон Politico сайт өртсөн бөгөөд тэд шүүхэд хандсан байна. Нэхэмжлэлдээ: "Энэхүү хориг нь Үндсэн Хуулийн Нэгдүгээр нэмэлт өөрчлөлтөд (үг хэлэх, хэвлэн нийтлэх эрх чөлөө) шууд халдсан үйлдэл төдийгүй Үндсэн Хуулийн суурь зарчмуудыг илт зөрчсөн хэрэг юм" гэжээ.

Таван сувгийн хамтарсан байр суурь

Үүний дараа CNN-ийг оролцуулаад АНУ-ын телевизийн таван том суваг Цагаан ордны үйл ажиллагааг сурвалжлахаас түр татгалзаж байгаагаа мэдэгдсэн. ABC, CBS, CNN, Fox, NBC сувгуудын хамтарсан мэдэгдэлд: "Олон нийт засгийн газрынхаа талаар үнэн зөв, хараат бус мэдээлэл авах амин чухал сонирхолтой байдаг. Аливаа засаг захиргаа нь хэвлэл мэдээллийн байгууллагын нийтэлсэн мэдээ мэдээлэлд сэтгэл дундуур байгаагийнхаа төлөө тэдний үйл ажиллагааг хязгаарлаж болохгүй" гэсэн байна.

Бойкотын улмаас энэ долоо хоногт Нью-Йорк хотод болох НҮБ-ын ерөнхий ассамблейн чуулганд Трамп оролцохтой холбоотой үйл явдлыг дээрх сувгууд сурвалжлахгүй. Трамп чуулганы үеэр дэлхийн олон орны төрийн тэргүүнүүдтэй уулзана.

Трампын байр суурь

80 настай ерөнхийлөгч байр сууриа хамгаалж, хэвлэл мэдээллийн хэрэгслүүдийг үндэсний аюулгүй байдалд заналхийлэгч хүч, "хорт хавдар" гэж шүүмжилсэн. Тэрээр сошиал хуудсандаа: "Цагаан ордны зүгээс миний эрхэмлэн дээдэлдэг хэвлэлийн эрх чөлөөнд халдсан зүйл байхгүй. Харин ч энэ нь бидний хайртай Америкийн Нэгдсэн Улсад хорт хавдар мэт газар авсан ХУУРАМЧ МЭДЭЭ-ний эсрэг тэмцэл юм" гэж бичжээ.

Баасан гарагт Трамп хэвлэл мэдээллийн хэрэгслүүдэд хориг тавихдаа тодорхой шалтгаан тайлбарлаагүй. "Энэ үнэндээ сүүлийн хоёр жилийн хугацаанд хуримтлагдсан зүйлсийн үр дүн. Тэд Бүгд Найрамдахчууд болон Бүгд Найрамдахчуудын засаг захиргааг дорд үзсээр ирсэн" гэж тэр хэлсэн. Мөн бусад хэвлэл мэдээллийн хэрэгслүүд ижил хоригт орж болзошгүйг анхааруулсан.

Реалити шоуны од асан Трамп өөрийн сонгуулийн кампанит ажил, засаг захиргааг шүүмжилсэн хэвлэл мэдээллийн хэрэгслүүдтэй тэмцсээр ирсэн түүхтэй. Хоёр бүрэн эрхийн хугацааныхаа аль алинд тэрээр өөрийн амжилт бүтээлийг "хангалттай сайн мэдээлээгүй" хэмээн хэвлэлүүдийг буруутгаж байв.

Эх сурвалж: AFP