Трамп Ши Жиньпинийг нисэх буудал дээр угтаж, 1962 оноос хойшхи ховор хүндэтгэл үзүүлэв

БНХАУ-ын дарга Ши Жиньпиний АНУ-д хийх төрийн айлчлал эхэллээ. Түүний онгоц Вашингтоны гадна оршдог Joint Base Andrews цэргийн нисэх буудалд газардсаны дараа АНУ-ын ерөнхийлөгч Дональд Трамп, тэргүүн хатагтай Меланиа нар угтаж авсан байна.

Трамп гаднын төрийн тэргүүнүүдийг ихэвчлэн Цагаан ордонд угтаж авдаг бөгөөд нисэх буудал дээр угтах нь ховор. Хамгийн сүүлд 1962 онд АНУ-ын ерөнхийлөгч гадаадын хүндэт зочноо нисэх онгоцны буудал дээр угтан авч байсныг эх сурвалжууд мэдээлжээ. Харин өнгөрсөн тавдугаар сард Бээжинд айлчилсан Трампт ийм хүндэтгэл үзүүлээгүй юм.

Ши Жиньпиний гурван өдрийн төрийн айлчлалын үеэр 30 метр урт улаан хивс дэвсэж, 21 хүний бүрэлдэхүүнтэй хүндэт харуул, АНУ болон Хятадын төрийн далбааг залсан тус бүр гурван хүний бүрэлдэхүүнтэй хоёр бүлэг, АНУ-ын зэвсэгт хүчний төрөл тус бүрээс таван хүний бүрэлдэхүүнтэй гурван салаа цэрэг жагсаж, их буугаар 21 удаагийн ёслолын буудлага үйлдэж, B-1 Lancer цэргийн онгоцоор хоёр удаа нислэгийн үзүүлбэр үзүүлж, хоёр америк хүүхэд цэцэг барьж хүндэтгэл үзүүлжээ. Ши Жиньпин, түүний гэргий Пэн Лиюань нарыг угтаж авах ёслолд эдгээр арга хэмжээ багтсан байна.

Айлчлалын өмнө АНУ-ын сангийн сайд Скотт Бессент, Хятадын ерөнхий сайдын орлогч Хэ Лифэн нарын тэргүүлсэн төлөөлөгчдийн дараалсан уулзалтууд өндөрлөж, арваннэгдүгээр сарын 10-нд өндөрлөх байсан худалдааны дайны гал зогсоох гэрээг хоёр сараар сунгасан байна. Бессент айлчлалын өмнөх өдөр Fox News сувгаар хэлэхдээ: “Бид өнөөдөр арваннэгдүгээр сарын 10-ны өдөр дуусгавар болох ёстой хоёр улсын хоорондын эдийн засгийн зөөлрөл буюу Пусаны гэрээг сунгахаар тохиролцлоо” гэжээ. Энэхүү гэрээг өнгөрсөн онд хэрэгжүүлж эхэлсэн бөгөөд наймдугаар сард Өмнөд Солонгосын Пусан хотод болсон хоёр талын уулзалтаар сунгаж байв.

Энэ удаагийн айлчлалын үеэр хиймэл оюуны технологийн асуудал голлон яригдах төлөвтэй байна. Талууд энэхүү шинэ технологийн зохицуулалтын механизмыг бий болгож, хяналтаас гаргахгүй байхад хамтран ажиллахаар тохиролцож магадгүй юм.